„ნაციონალური მოძრაობის“ წევრის ზვიად კუკავას შეფასებით,ირაკლი ალასანია უღიმღამო პოლიტიკოსია, რადგან მან პოლიტიკაში თავისი ნიშის დაკავება ვერ შეძლო. თავად კუკავა დარწმუნებულია, რომ სურვილის შემთხვევაში, ის  „ნაციონალური მოძრაობის“ ერთ-ერთი აქტიური სახე გახდებოდა. ამ ეტაპზე კუკავამ არ იცის საპარლამენტო სიაში მოხვდება თუ არა, თუმცა, დარწმუნებულია უმუშევარი  არ დარჩება.

from.ge ზვიად კუკავას ესაუბრა:

– რატომ უწოდეთ ირაკლი ალასანიას უღიმღამო პოლიტიკოსი?

– მისი ქმედებებიდან გამომდინარე, მეტი არაფრის გამო.

– რა ქმედებებიდან გამომდინარე?

–მას შეეძლო ოპოზიციის ლიდერი გამხდარიყო და ვერანაირად ვერ გახდა.

– ივანიშვილის ქოლგის ქვეშ დაიკარგა?

– არა, ივანიშვილამდე შეეძლო გამხდარიყო ოპოზიციის ლიდერი. 2009 წელს მას მეტ-ნაკლებად ჰქონდა ოპოზიციის ლიდერობის შანსი, რომ პოლიტიკაში  თავის ნიშა დაეკავებინა, რაც ვერ შეძლო. რადგან ივანიშვილის ნავში ჩაჯდა, ამით კიდევ უფრო გაიუარესა თავის მდგომარეობა.   

– ნიშაში რას გულისხმობთ, ირაკლი ალასანია ხომ ოპოზიციის ერთ–ერთი ლიდერია?

– რაში გამოიხატება მისი ლიდერობა?

– მას აქვს პარტია და აქტიური, რეიტინგული პიროვნებაა..

– პარტია აქვს ჯონდი ბაღათურიასაც - „ქართული დასი“.

– მერე ბაღათურიას რეიტინგი არა აქვს?

–„ქართულ დასში“  მარტო ჯონდი ბაღათურიაა, მეორე ადამიანი დამისახელეთ მის პარტიაში, რომელიც საზოგადოებაში ცნობადია. ანალოგიურად არის ალასანიას პარტიაშიც. კი ბატო ზურაბ აბაშიძეს დაასახელებთ ალბათ...

– არა მარტო ზურაბ აბაშიძეს, ალასანიას პარტიაში არიან: გიორგი ცაგარეიშვილი, თეა წულუკიანი, ალექსი პეტრიაშვილი, ვიქტორ დოლიძე, ირაკლი ჩიქოვანი  და კიდევ ძალიან ბევრი...

– ძალიან ბევრი ცნობადი სახე არ არის. მათ იმის გამო იცნობთ, რომ თავის დროზე ხელისუფლებაში იყვნენ, მეტი არაფრის გამო.

– ისინი თუ არ არიან ცნობადი სახეები, თქვენ ხართ ცნობადი სახე?

– მე,პოლიტიკურ ლიდერობაზე პრეტენზია არა მაქვს, ალასანიასგან განსხვავებით.

– კი, მაგრამ ნაციონალური მოძრაობის სახე ხომ ხართ?

– ნაციონალური მოძრაობის ერთ-ერთი წარმომადგენელი ვარ, რიგითი წევრი.

– რიგითი წევრი კი არა, საფინანსო-საბიუჯეტო კომიტეტის თავმჯდომარის მოადგილე ხართ?

–კი, თანამდებობა ერთია, პოლიტიკური აქტიურობა მეორეა. ირაკლი ალასანიასგან განსხვავებით, მე, არ მომინდომებია გავხდარიყავი „ნაციონალური მოძრაობის“ ლიდერი, მისი ერთ-ერთი სახე.

– არ მოგინდომებიათ, თუ უბრალოდ ვერ გახდით?

– არ მომინდემებია.

– რომ მოგენდომებინათ გახდებოდით?

– რომ მოვინდომო ალბათ გავხდები.

– მაღალი რეიტინგი არ გაქვთ, არადა, 3 წელია პარლამენტში ხართ და აქტიური ლიდერი ვერ გახდით?

– მე ამის პრეტენზია არა მაქვს, განსხვავებით ალასანიასგან.

– რატომ ? ყოველი ჯარისკაცი ხომ გენერლობაზე ოცნებობს?

– კი, ბატონო, მაგრამ მე ამის პრეტენზია არა მაქვს. მე ვაკეთებ ჩემს საქმეს იმ საქმეს, რაც ქვეყნისთვის არის საჭირო და იმისათვის, რომ კანონმდებლობა დახვეწილი იყოს.  

– დღემდე ერევით დეპუტატებს და ზვიად კუკავას ნაცვლად კახა კუკავას  გეძახიან...

– მერე რა პრობლემაა, მე ამაზე მხოლოდ იუმორით ვპასუხობ.

– იმასაც რომ ამბობენ, რომ ზვიად ძიძიგურისა და კახა კუკავას ჰიბრიდი ხართ?

– კი, ამასაც ამბობენ და ამის ავტორსაც ვესაუბრე.

– ვის?

–ერთ–ერთი ავტორი ლევან ვეფხვაძეა, თავიდან მივედი და ვუთხარი, ეს როგორ თქვი, ვის გაუბედე? სერიოზული სახით ვკითხე, სინამდვილეში კი  ვხუმრობდი. უცებ შეცბა, აღარ იცოდა რა ექნა.

– ვეფხვაძე შეაშინეთ?

– არა, მერე გამეცინა.

– თქვენზე ამბობენ, რომ ბევრ კანონპროექტს თქვენი გვარი აწერია, თუმცა ამ კანონპროექტის შინაარსი არ იცით.

– ასე ამბობენ?

– ჟურნალისტები ხშირად გეკითხებით ამა თუ იმ კანონპროქტის შესახებ,  რომელსაც თქვენი გვარი აწერია, მაგრამ არ იცით, რატომ?

– ყველა კანონპროექტი ვიცი და ყველა კანონპროექტზე მაქვს ინფორმაცია.

– დეტალებში რომ არ იცით?

– როგორ არ ვიცი, ვიცი.

– მაშინ რატომ არ აკეთებთ კომენტარს?

– იმიტომ რომ, იმ კონკრეტულ შემთხვევაში შეიძლება დაკავებული ვარ, ან სხვა ვინც მომხსენებელია, შეიძლება მან მეტი განმარტება მოგცეთ.

– თქვენ საერთოდ პარლამენტში როგორ მოხვდით, ვისი პროტეჟე ხართ?

– ნაციონალური მოძრაობის.

– კონკრეტული პიროვნების პროტეჟე არ ხართ?

– ნიკა გვარამიას არაოფიციალური „კვოტით“ ვარ შემოსული, ნიკა გვარამიას რეკომენდაციით მოვხვდი.

– მანამდე ნიკა გვარამიას იურიდიული ფირმა რომ ჰქონდა იქ საქმიანობდით?

– კი, ეს ადრეულ პერიოდში იყო, იქ იურისტი ვიყავი.

– რა ერქვა იმ ფირმას?

– „სანდო“.

– ამ ფირმაში კახა კუკავაც იყო?

– კი კუკავას და დათო სააკაშვილის ერთობლივი კომპანია იყო.

– მიხეილ სააკაშვილის ძმის მეგობარი ხართ?

– კარგად ვიცნობ.

– პოლიტიკაში დარჩენას აპირებთ?

– გადაწყვეტილი არა მაქვს.

– საპარლამენტო სიაში ჩაგწერენ?

– არ ვიცი.სიების თაობაზე ჯერ „ნაციონალურ მოძრაობაში“ საუბარი არ არის.

– გული დაგწყდებათ სიაში საკუთარ თავს თუ ვერ იხილავთ?

– არა.

– რას გააკეთებთ სიაში თუ არ იქნებით?

– იურისტი ვარ, შესაბამისად, იურისტის საქმიანობას გავაგრძელებ.

– სადმე კერძო კომპანიაში?

– აუცილებელი არ არის კერძო  კომპანიაში, შესაძლოა, საჯარო სამასახურში დავრჩე.

– საჯარო სამსახურში ადგილი უკვე გამზადებული გაქვთ?

– ასე არ არის როგორც ბევრ ჩვენს ოპონენტს წარმოუდგენია, რომ ვიღაცას ადგილს გაუმზადებენ ან სასათბურე პირობებს შეუქმნიან.

– შეიძლება უმუშევარიც დარჩეთ?

– არა, უმუშევარი ნამდვილად არ დავრჩები, ჩემი პროფესია უმუშევრად დარჩენის საშუალებას არ მომცემს.