ALDE-ს დუმილი ანაკლიის პორტის საქმეზე, ხაზარაძე-ჯაფარიძის მორიგ მარცხთან დაკავშირებით - „ლიბერალების და დემოკრატების ალიანსი ევროპისთვის“ ამ დრომდე არ გამოხმაურებია ვაშინგტონის არბიტრაჟის გადაწყვეტილებას. მმართველ გუნდში აცხადებენ, რომ ALDE-ს დუმილი იმის ფონზე, რომ ის ხაზარაძე-ჯაფარიძის საკითხებს მაშინვე ეხმიანებოდა, ორმაგი სტანდარტის მანიშნებელია.
„დავუშვათ თეორიულ დონეზე, რომ ამ საარბიტრაჟო სასამართლოს საქართველოს სახელმწიფოს საწინააღმდეგო განცხადება მიეღო. ვერც „ლელოს“ და ვერც ALDE-ს წარმომადგენლებს ვერ ჩამოხსნიდი დღის წესრიგიდან, ტელევიზიებიდან და სააგენტოებიდან. ALDE, რომელიც არის დიდი ლიბერალურ-დემოკრატიული ალიანსი ევროკავშირში და რომლის წევრიც არის „ლელო“, დღეს ჩირგვებშია შემძვრალი პირდაპირი გაგებით. მისი წევრი პარტიის წარმომადგენელი დამარცხდა თავისივე ქვეყნისა და ხალხის წინაშე. აი ეს არის პირდაპირი ორმაგი სტანდარტები“, - განაცხადა „ხალხის ძალის“ აღმასრულებელმა მდივანმა გურამ მაჭარაშვილმა.
