მე მინდა, კიდევ ერთხელ იმათ, ვინც არ იცის ავუხსნა და ვუთხრა ფაქტების შესახებ. „ქართული ოცნების“ ხელისუფლება რომ მოვიდა 2012 წლის პირველ ოქტომბერს ხელისუფლების სათავეში, ჩვენ აღმოვჩნდით სამართლებრივად ოკუპანტ სახელმწიფოსთან, რუსეთის ფედერაციასთან რამდენიმე სხვადასხვა სასამართლოში ჰააგასა და სტრასბურგში პირისპირ ისე, რომ არავითარი მტკიცებულება იმისა, რომ ჩვენი ჯარი და ჯარისკაცი იყო მართალი არ გვქონდა, - განაცხადა გადაცემა „იმედი LIVE“-ში პარლამენტის დროებითი საგამოძიებო კომისიის თავმჯდომარემ, პარლამენტის ვიცე-სპიკერმა თეა წულუკიანმა.

„იყო უბრალოდ გაგზავნილი ტექსტები, ზურაბ ადეიშვილის მოადგილის, თინა ბურჯალიანის და სხვათა მიერ, მაგრამ სასამართლოში ერთია რას წერ სასარჩელო მოთხოვნაში, რას წერ საჩივარში თუ სარჩელში და მეორეა რით ამყარებ, რა მტკიცებულებებით იმას, რასაც ამბობ. ეს მტკიცებულებები პრაქტიკულად არ არსებობდა და და ჩვენ დავინახეთ შოკირებულებმა, რომ შესაძლოა ჩვენი ჯარი ჰააგაში გამტყუნდეს და სწორედ ბიძინა ივანიშვილის დამსახურებაა, ეს მე შემიძლია ღიად ვთქვა, როდესაც მან პარტიის ოფისში ჩაატარა თათბირი, გასცა დავალებები და ყველა უწყებამ დაიწყო მტკიცებულებების შეგროვება.

იმ თათბირზე ბატონი ივანიშვილის მიერ ითქვა, რომ იუსტიციის სამინისტროს, რომელსაც მაშინ მე ვხელმძღვანელობდი და დავების წარმოება ჩვენი კომპეტენცია იყო, არავითარ შემთხვევაში, არცერთი მიმართულებით ხელი არ უნდა შეშლოდა, რომ დავები ეწარმოებინა მკაცრად და წმინდა სამართლებრივად. პოლიტიკური კომპონენტი დროებით უნდა გადადებულიყო გვერდზე. ამას ვამბობ საჯაროდ პირველად. ეს იყო სწორედ მისი გადაწყვეტილება. ამან მისცა „ქართული ოცნების“ მაშინდელ მთავრობასა და იუსტიციის სამინისტროს იმის საშუალება, რომ ეს პროცესი ჰააგასა და სტრასბურგში წარმართულიყო წმინდა სამართლებრივი მიმართულებით და ჩვენ სწორედ „ქართული ოცნების“ მინისტრებს, მთავრობას დაგვემტკიცებინა, რომ ქართული ჯარი და ჩვენი შეიარაღებული ძალები თავდაცვის თუ შინაგან საქმეთა სამინისტროსი, იყვნენ რუსეთის პირისპირ მართლები. რომ ჩვენი მოქალაქეები, მშვიდობიანი მოსახლეობა, იყო მართალი და მათ განიცადეს ეთნიკური წმინდა. რომ ანწუხელიძე, უშანგი სოფრომაძე და კახაბერ ხუბულური, ჩვენი სამხედრო ტყვეები, რომლებიც აწამეს და მოკლეს, სწორედ ოკუპანტი სახელმწიფოს ხელით იქნენ მოკლულები და რომ რეალურად სახეზე იყო მეორე მხრიდან, მტრის მხრიდან, ომის დანაშაული.

ჩვენ როდესაც ეს შევძელით და ეს იყო პირველი სასამართლო დოკუმენტები, რომელსაც ჩვენ ახალგაზრდა თაობას დაუტოვებთ, მათ სასამართლო გადაწყვეტილებები ექნებათ ხელში და შეძლებენ, თუ ჩვენ ეს ვერ მოვასწარით, მშვიდობიანი გზით და სამართლებრივი გზით გააერთიანონ საქართველო, როცა ამის დრო დადგება.

ახლა ბევრჯერ ისმის კითხვა, რატომ ახლა და არა მანამდე, სწორი და ამიტომ, რომ მანამდე იყო სასამართლო დავები მოსაგები და ჩვენ რუსეთს ყველა სასამართლო მოვუგეთ. ამის შემდეგ უკვე დადგა პოლიტიკური შეფასებების დრო. სამართლებრივად ჩვენი ჯარის სიმართლე დამტკიცებულია, ჩვენი მშვიდობიანი მოსახლეობის სიმართლე საერთაშორისო დონეზეა დამტკიცებული, ხოლო პოლიტიკური თანამდებობის პირები, სააკაშვილი, კეზერაშვილი, ვანო მერაბიშვილი, ვისაც არ ახსოვს, არ იცის ასაკის გამო ვინ არიან ეს პირები, სააკაშვილი იმედია მაინც იციან. დავით კეზერაშვილი გახლდათ ომის დროს თავდაცვის მინისტრი და პარალელურად აგრძელებდა ბიზნესის ტერორს და საკუთარი თავის გამდიდრებას ქართული ჯარის ხარჯზე და ვანო მერაბიშვილი იყო შინაგან საქმეთა მინისტრი. სწორედ ამ ხალხმა, პროფესიონალი სამხედროების და ჯარის აზრის გაუთვალისწინებლად აწარმოვა ის ომი, რომელიც ვაწარმოვეთ რუსეთის წინააღმდეგ და რომელშიც სასტიკად დავმარცხდით.

ამის ფონზე, როდესაც იქ ჩატოვეს და ჩაახოცვინეს მშვიდობიანი მოსახლეობა, როდესაც ჯარი გაწირეს და საზარბაზნე ხორცად აქციეს, რეზერვისტები ისე შეაგროვეს, რომ ცხოვრების ტრავმა მიაყენეს მათ იმ გაგებით, რომ ვერავინ ვერ გაიგო რისთვის წაიყვანეს, რამდენიმე დაიღუპა კიდეც აბსოლუტურად გაუაზრებელ ვითარებაში, ქაოსში და ვინც დაბრუნდა ისინი უკვე დღეს ზრდასრული მამაკაცები არიან და დღემდე ეკითხებიან საკუთარ თავს რა ვარგე მე ჩემს სამშობლოს და რატომ მოვხვდი იქ, სადაც მოვხვდი“, - აღნიშნა თეა წულუკიანმა.