უკრაინის შეიარაღებული ძალები აშშ-ის სამხედრო დახმარების გარეშე რუსეთთან ომში ზაფხულის დასაწყისამდე გაძლებს. ინფორმაციას CNN-ი ერთ-ერთ ევროპელ ჩინოვნიკზე დაყრდნობით ავრცელებს.
როგორც ევროპელმა ჩინოვნიკმა განაცხადა, აშშ-ის პრეზიდენტის, დონალდ ტრამპის ადმინისტრაციის გადაწყვეტილება უკრაინისთვის სამხედრო დახმარების შეჩერების შესახებ არის „მცირე და არასწორი“.
მისი თქმით, ეს უკრაინელ ხალხში აშშ-ის მთავრობის მიმართ ნდობას შეამცირებს. ევროპელმა ჩინოვნიკმა აგრეთვე განაცხადა, რომ დახმარების შემცირებას უკრაინის სამოქალაქო მოსახლეობაში მსხვერპლის ზრდა მოჰყვება, რადგან ქვეყანა რუსეთის საჰაერო იერიშებისგან თავს ვერ დაიცავს, ვინაიდან მას ჰაერსაწინააღმდეგო რაკეტების მარაგი ამოეწურება.
„მე ძალიან გულდაწყვეტილი ვარ“, - ციტირებს CNN-ი ევროპელ ჩინოვნიკს.
როგორც მან აღნიშნა, თუ უკრაინა არსებულ საბრძოლო ტემპს შეინარჩუნებს, ის რამდენიმე კვირას გაძლებს, შესაძლოა ზაფხულის დასაწყისამდე, სანამ ამერიკის გადაწყვეტილებას სერიოზული შედეგები მოჰყვება.
როგორც ტელეარხი აღნიშნავს, ჯო ბაიდენის ადმინისტრაციამ მმართველობის ბოლო დღეებში უკრაინისთვის შეიარაღების მიწოდება დააჩქარა და ის შეტევითი იარაღის დიდი მარაგით უზრუნველყო. ამ იარაღმა, მათ შორის შორი მანძილზე მოქმედი ATACMS-ის რაკეტებმა უკრაინას რუსეთის ტერიტორიის სიღრმეში დარტყმების განხორციელების შესაძლებლობა მისცა.
როგორც CNN-ი წერს, მიუხედავად იმისა, რომ ევროპამ, შესაძლოა, ჩაანაცვლოს ამერიკული საარტილერიო ჭურვები, ყველაზე თანამედროვე იარაღი, რომელსაც კიევი ფრონტის ხაზზე იყენებს, მაინც ამერიკულია.
