ყველა მტკიცებულება ბრალდებულ გიორგი ბაჩიაშვილის დამნაშავეობას ცალსახად ადასტურებს, - განუცხადა პროკურორმა მიხეილ სადრაძემ ჟურნალისტებს გიორგი ბაჩიაშვილის დღევანდელი სასამართლო პროცესის დასრულების შემდეგ.

მიხელ სადრაძის თქმით, ეს მტკიცებულებები, ძალიან ბევრი მათგანი არის დოკუმენტური ხასიათის.

„ანუ, მარტივად რომ ვთქვათ, ყველა ქმედება ასახული და გადატანილია დოკუმენტებზე. ასევე, კიდევ ერთი მნიშვნელოვანი ხასიათის მტკიცებულება, რაზეც ხაზგასმა გავაკეთე, ეს არის თავად გიორგი ბაჩიაშვილის მიერ განხორციელებული მიმოწერები, სადაც პრაქტიკულად, ის აღიარებს მის მიერ დანაშაულის ჩადენას იმიტომ, რომ ყველა არსებით გარემოებასთან დაკავშირებით ის სხვადასხვა პოზიციებს აფიქსირებს. ამას ჩვენ გამოვიკვლევთ და ბუნებრივია თქვენც, საზოგადოებასაც და სასამართლოსაც ექნება შესაძლებლობა შეაფასოს.

რაც შეეხება სხვა მტკიცებულებებს, სხვა კითხვებს, ბუნებრივია, აბსოლუტურად ყველა პირი დაიკითხება, ვისაც აქვს ინფორმაცია და არსებითი ხასიათის ინფორმაციას და განმარტებებს მისცემს სასამართლოს“, - აღნიშნა მან.