რაც შეეხება საპრეზიდენტო არჩევნებს, პრეზიდენტი თანამდებობაზე არის 29 დეკემბრამდე და შეიძლება, მანამდე ძალიან ბევრი რაღაც მოხდეს, - განაცხადა ევროკავშირის საგარეო პოლიტიკური უწყების ხელმძღვანელმა, კაია კალასმა ბრიუსელში ევროკავშირის საგარეო საქმეთა მინისტრების საბჭოს სხდომის დაწყებამდე.

მისი შეფასებით, საქართველოში მოვლენები არ მიდის სწორი მიმართულებით და ამ სიტუაციაში, რისი გაკეთებაც ევროკავშირს შეუძლია, არის სანქციები და უვიზო რეჟიმის შეზღუდვა.

„ყველა ის მოვლენა, რასაც ამჟამად საქართველოში ვხედავთ, არ მიდის სწორი მიმართულებით, სადაც კანდიდატი ქვეყნები უნდა იყვნენ. ასე რომ, ჩვენ განვიხილავთ, რა შედეგები მოჰყვება იმას, რომ საქართველოს მთავრობა იყენებს რეპრესიებს ოპოზიციის წინააღმდეგ. რა შეგვიძლია, გავაკეთოთ ევროპულმა მხარემ? ერთი საკითხია სანქციები, მეორე საკითხი – უვიზო რეჟიმის შეზღუდვა“, – განაცხადა კაია კალასმა.

კითხვაზე, – „გააგრძელებთ თუ არა საქართველოს პრეზიდენტის სალომე ზურაბიშვილის მხარდაჭერას ე.წ. არჩევნების შემდეგ?“ – კალასმა განაცხადა:

„რაც შეეხება საპრეზიდენტო არჩევნებს, პრეზიდენტი თანამდებობაზე არის 29 დეკემბრამდე და შეიძლება, მანამდე ძალიან ბევრი რაღაც მოხდეს“, – განაცხადა კაია კალასმა.