“ერთიანობა - ნაციონალური მოძრაობის“ ერთ-ერთი ლიდერი, გიორგი ვაშაძე, ჟურნალისტებს მოუწოდებს, „ქართული ოცნების“ ბანერი დააზიანონ. ამის შესახებ მან მმართველი პარტიის ბანერების დაზიანების ფაქტებზე დასმული კითხვის პასუხად განაცხადა.

ვაშაძე მიიჩნევს, რომ ბანერები „არა ომს, აირჩიე მშვიდობა“, თავს ჭრის საზოგადოებას  და „არ შეესაბამება ქართულ გენს“, ამიტომ, სიმბოლურად ყველა უნდა მივიდეს და დააზიანოს.

„ეგ ისეთი სამარცხვინო ბანერებია, მე მგონი, თქვენც უნდა მიხვიდეთ და დააზიანოთ, იმიტომ, რომ თავს ჭრის საზოგადოებას. მართლა გეუბნებით. თქვენც უნდა მიხვიდეთ ჩემი აზრით და ყველა ღირსეული ქართველის პასუხისმგებლობაა, საკუთარი აზრი გამოთქვას ამ ბანერებთან მიმართებით. მე ვფიქრობ, შეურაცხყოფა რომ ჩამოვირეცხოთ, დიახ, თქვენც უნდა მიხვიდეთ და დააზიანოთ ეს ბანერები. იმდენად სამარცხვინოა და თავის მომჭრელი და არ შეესაბამება ქართულ გენს, შინაარსს და ქართულ ისტორიას, კარგი იქნება თუ თქვენც სიმბოლურად მიხვალთ და დააზიანებთ.“ - განუცხადა გიორგი ვაშაძემ ჟურნალისტებს.