დაპირისპირებულ მხარეებს შორის დიალოგის უალტერნატივობაზე ისაუბრა „ხალხის ძალის“ გენერალურმა მდივანმა დიმიტრი ხუნდაძემ და აღნიშნა, რომ შეთანხმება შეუთანხმებლობას ყოველთვის სჯობს. როგორც მან ჟურნალისტებთან განაცხადა, დიალოგი საჭიროა, თუმცა რეალობა ძალიან მძიმეა იმის გათვალისწინებით, რომ უცხო ძალების მხრიდან ვითარების განმუხტვის ნაცვლად, ხდება დაძაბულობის წახალისება.
„შეთანხმება შეუთანხმებლობას ყოველთვის სჯობს, მაგრამ რეალობა საკმაოდ მძიმეა, როდესაც ჩვენი პარტნიორების მხრიდან ხშირად ხდება გარე დაფინანსებით ქვეყნის შიგნით დესტრუქციული ქმედებების მოწყობის წახალისება. დღეს, რასაც ვუყურებთ ჩვენ თბილისის ქუჩებში, ესეც ხდება წახალისებით და წაქეზებით. პირდაპირი მესიჯია არ წაიკითხონ და გააპროტესტონ, ანდა უნდა გააპროტესტებინონ ქვეყნის შიგნით საზოგადოებას ქვეყნის დაცვის მიზნითვე შემუშავებული კანონი, თან კანონი, რომელიც დასავლეთში არის დასავლური და რატომღაც საქართველოში ის არის რუსული," - განაცხადა დიმიტრი ხუნდაძემ.
„ხალხის ძალის“ ერთ-ერთი ლიდერი საქართველოსთან მიმართებაში დასავლეთის მხრიდან მოქმედ ორმაგ სტანდარტზე საუბრობს და აღნიშნავს, რომ ეს მიდგომა დღის წესრიგიდან უნდა მოიხსნას. „ორმაგი სტანდარტებისგან უნდა გავთავისუფლდეთ, დავიწყოთ საუბარი და რა თქმა უნდა, ქვეყანას მისი მასშტაბის მიუხედავად, არ უნდა ავუკრძალოთ თავისი ინტერესების პრიორიტეტულად დაცვა,“ - განაცხადა დიმიტრი ხუნდაძემ.
