ხერხემლის პრობლემების გადაჭრა არც თუ ისე მარტივია, მაგრამ არსებობს მეთოდები, რომლებიც მსგავსი დისკომფორტის გაჩენის რისკს ამცირებს. ამისთვის აუცილებელია, რომ თუ ჩვენი სამუშაო დიდხანს ჯდომასა და ერთ ადგილზე ყოფნას უკავშირდება სხეულის სწორი მდგომარეობა შეინარჩუნოთ - ეს ხერხემალზე დაწოლასა და სტრესს ამცირებს. ასევე, ხერხემლის პრობლემების პრევენციისთვის აუცილებელია ვარჯიში, ცურვა და ფეხით სიარული. რიგ შემთხვევებში, მიზანშეწონილია ხერხემლის კორსეტების გამოყენებაც. ეს სამედიცინო საშუალებები ხერხემლის თანდაყოლილი პათოლოგიების, ზურგის სვეტის დაზიანებების, ოსტეოპოროზისა და რადიკულიტის დროს საკმაოდ ეფექტურია. ისინი ხერხემლის სრულფასოვან სტაბილიზაციასა და ფიქსაციას უზრუნველყოფს. ამ პროდუქციის გამოყენება ეფექტურია ისეთი დაავადებების დროს როგორიცაა:
- სქოლიოზი - იგივე ხერხემლის გამრუდება, ხშირია მოზარდებში, რადგან ბავშვის სწრაფი ზრდისას კუნთოვანი კარკასი ვერ ეწევა ძვლებს, ეს კი ხერხემლის კუნთებისა და იოგოვანი აპარატის დასუსტებას განაპირობებს. არსებობს შედარებით მსუბუქად მიჩნეული I და II ხარისხის სქოლიოზი და III და IV ხარისხის - რომელიც სერიოზული პათოლოგიაა და ორგანოთა მთელ წყობას აზიანებს.
- მალთა-შუა დისკის თიაქარი - ხერხემლის ერთ-ერთი ყველაზე გავრცელებული პრობლემა ოსტეოქონდროზია, მალთა-შუა დისკის თიაქარი კი მისი ერთ-ერთი გართულება. ეს დაავადება შეიძლება ადამიანს გენეტიკურად გადაეცეს ან სიმსუქნემ, ხანდაზმულმა ასაკმა, ტრავმამ, ინფექციებმა და ფიზიკურმა დატვირთვამ გამოიწვიოს. ამ დროს დარღვეულია დისკის მთლიანობა და ადგილი აქვს დეფექტიდან პულპოზური ბირთვის გამოვარდნას.
- ზურგის ტკივილი - ზურგის ტკივილი შესაძლოა ბევრი მიზეზით იყოს განპირობებული და განსხვავებული სიმპტომებიც გამოიწვიოს. ამ პრობლემის ყველაზე გავრცელებულ მიზეზებად სახელდება: მჯდომარე ცხოვრების წესი, ხერხემლის პათოლოგიები, ფიზიკური დატვირთვა და პროფესიული საქმიანობა.
ხერხემლის პრობლემების თავიდან ასარიდებლად ეცადეთ, რომ ყოველთვის დაჯდეთ კომფორტულ პოზაში, რადგან მჯდომარე მდგომარეობაში ხერხემალზე ზეწოლა განსაკუთრებით მატულობს. პერიოდულად აკეთეთ მსუბუქი ვარჯიშები. ხანგრძლივი დასვენება ზურგის არეში ტკივილს აუარესებს, ვარჯიში კი ჭიმავს და აძლიერებს ზურგის კუნთებს. ასევე შეარჩიეთ ძილის სწორი პოზა და პერიოდულად გაიარეთ ფიზიკური თერაპია.
