უკრაინის პრეზიდენტის, ვოლოდიმირ ზელენსკის განცხადებით, პოლონეთთან ერთობლივი, ისტორიული საბაჟო კონტროლი წესდება.
„მიღებულია გადაწყვეტილება, რომელიც რევოლუციას მოახდენს ჩვენს საზღვარზე არსებულ წესრიგში. ვნერგავთ საერთო საბაჟო კონტროლს პოლონეთთან. ეს მნიშვნელოვნად დააჩქარებს სასაზღვრო პროცედურებს, აღმოფხვრის კორუფციული რისკების უმეტესობას. მაგრამ ეს ასევე არის ევროკავშირის საერთო საბაჟო სივრცეში ჩვენი ინტეგრაციის დასაწყისი. ეს მართლაც ისტორიული პროცესია,”- განაცხადა ზელენსკიმ.
მისი თქმით, უკრაინაში ვიზიტად მყოფ პოლონეთის პრეზიდენტთან, ანჯეი დუდასთან უკრაინის მიმართ მხარდაჭერასა და რუსეთის წინააღმდეგ უფრო მკაცრი სანქციების შესახებ ისაუბრა.
„რა თქმა უნდა, დღეს ანჯეისაც ვესაუბრეთ უკრაინის თავდაცვის მხარდაჭერაზე და რუსეთის წინააღმდეგ უფრო მკაცრი სანქციების დაწესების შესახებ. ასევე იმაზე, თუ რა ნაბიჯების გადადგმაა საჭირო იმისთვის, რომ საერთო მიზანს – უკრაინის ევროკავშირში სრულუფლებიან გაწევრიანებას მივაღწიოთ,”- აღნიშნა ზელენსკიმ.
