სრულიად საქართველოს პატრიარქმა, უწმინდესმა და უნეტარესმა, ილია მეორემ სასულიერო პირებთან ერთად, სამების საკათედრო ტაძარში ბზობის დღესასწაულთან დაკავშირებით, საზეიმო წირვა-ლოცვა აღავლინა. წირვა-ლოცვის დასრულების შემდეგ, მრევლს საპატრიარქოს ტახტის მოსაყდრე, სენაკისა და ჩხოროწყუს მიტროპოლიტმა შიომ (მუჯირი) მიმართა და მათ ბზობის დღესასწაული მიულოცა.

„ეს დღე საოცარი გამონათება იყო - თითქოს, ყველამ ცნო იგი, როგორც მეფე, მეუფე, როგორც მესია, როგორც სასწაულმოქმედი... სულ რამდენიმე დღეში, იგივე ხალხმა მოითხოვა უფალ იესო ქრისტეს ჯვარცმა და სიკვდილით დასჯა. ჩვენ გვაფიქსრებს ეს მოვლენა ადამიანის ცვალებადობაზე, ჩვენს ცვალებადობაზე, ჩვენს თავშიც შეგვიმჩნევია, რომ ის ოსანა, რომელიც ჩვენს სულშია, ხშირად შეცვლილა საპირისპირო განწყობით და ადამიანები თავიანთი ცოდვებით, თავიანთი ვნებებით, მიუხედავად იმისა, რომ ოსანა უგალობიათ, კვლავ ითხოვენ ქრისტეს ჯვარცმასა და დასჯას“, - აღნიშნა მეუფე შიომ.