მმართველი გუნდისთვის გაუგებარია, რატომ გამოიწვია ოპოზიციის მხრიდან ხმაური მეცხრე კლასის ისტორიის სახელმძღვანელოში ბიძინა ივანიშვილის ბიოგრაფიის შეტანამ. მეცენატი, რომელსაც ჩვენი ქვეყნის განვითარებაში დიდი როლი მიუძღვის - ასეთია შეფასებები, რომელსაც „ქართული ოცნება“ აკეთებს.

„3 მილიარდის ქურდები უარყოფითად აფასებენ ბიძინა ივანიშვილის მეცენატად და ქველმოქმედად მოხსენიებას, იმ ადამიანისა, რომელსაც 3 მილიარდი ქველმოქმედებაში აქვს საქართველოში დახარჯული. ეს არის მორიგი მცდელობა რომ სინამდვილე სრულად ამოატრიალონ. ამას ვერ შეძლებენ, ვინაიდან საზოგადოებამ იცის ბიძინა ივანიშვილის ქველმოქმედების მასშტაბების შესახებ. უამრავ სფეროში, მათ შორის განათლების სფეროში არის არაერთი სერიოზული საქველმოქმედო ინვესტიცია განხორციელებული, ეკლესიების მშენებლობა-აღდგენა, თეატრები, მუზეუმები. როდესაც ასეთ დროს შენ სიტყვა „მეცენატს“ და „ქველმოქმედს“ ეჭვქვეშ აყენებ, ეს თავისთავად მეტყველებს იმაზე, თუ რამდენად სიცრუეზეა აგებული ეს პოლიტიკური ძალა თავისი ტელევიზიებითა და სიცრუის პროპაგანდით“, - აცხადებს მმართველი გუნდის თავმჯდომარე ირაკლი კობახიძე.

ზოგიერთი ოპოზიციური პარტია მე-9 კლასის ისტორიის სახელმძღვანელოს პროგრამიდან ამოღებას ითხოვს. მათი განმარტებით, სახელმძღვანელო, რომელსაც განათლების სამინისტროსგან გრიფი აქვს მინიჭებული, პროპაგანდისტულია.