მე-18 სამედიცინო დაწესებულება სრულად არის აღჭურვილი, მათ შორის პირდაპირ ეთერში პროფესიონალმა ექიმებმა თქვეს, რომ აბსოლუტურად ყველა ტექნიკა არსებობს და მობილიზებულია სამედიცინო ჯგუფი, რომ პაციენტისთვის აღმოჩენილი იყოს ყველანაირი სამედიცინო დახმარება, - ამის შესახებ საპარლამენტო უმრავლესობის წევრმა, გურამ მაჭარაშვილმა განაცხადა.

მისივე თქმით, კონსილიუმის წევრებმაც დაადასტურეს, რომ საავადმყოფოში არის შესაბამისი აღჭურვილობა.

„კონსილიუმის წევრებმაც დაადასტურეს, რომ ამ საავადმყოფოში არის შესაბამისი აღჭურვილობა და მობილიზებულია ექიმთა ჯგუფი. რაც შეეხება განცხადებას, რომ კარგი იქნება სხვა კლინიკაში მისი გადაყვანა, მეც შემიძლია ვთქვა, რომ კარგი იქნებოდა, მიხეილ სააკაშვილი პატიმარი საერთოდ არ ყოფილიყო, მაგრამ სამწუხაროდ, ეს ჩვენზე არ არის დამოკიდებული, ეს თავად მის ქმედებებსა და მართლმსაჯულებაზეა დამოკიდებული. ქვეყანაში არსებობს კანონი და მის წინაშე ყველა თანასწორია. რომელიმე პროფესიონალი ექიმის დასკვნა, რომ სააკაშვილს სჭირდება კონკრეტული მომსახურება და ეს არ არის მე-18 დაწესებულებაში, მსგავსი არ ყოფილა“, – განაცხადა მაჭარაშვილმა.

საქართველოს ყოფილი პრეზიდენტი, მიხეილ სააკაშვილი 1-ელ ოქტომბერს დააკავეს.პატიმრობაში მყოფმა სააკაშვილმა შიმშილობა გამოაცხადა. სააკაშვილის ადვოკატები და სახალხო დამცველი ყოფილი პრეზიდენტის სამოქალაქო საავადმყოფოში გადაყვანას ითხოვენ, იუსტიციის სამინისტრო კი აცხადებს, რომ #18 სასჯელაღსრულების (სამკურნალო) დაწესებულებაში სააკაშვილის მკურნალობისთვის ყველა აუცილებელი პირობა არსებობს.

6 ნოემბერს პენიტენციურმა სამსახურმა გაასაჯაროვა იმ პროდუქტების ამსახველი ფოტომასალა, რომლებითაც პატიმარი სააკაშვილი იკვებებოდა. მიხეილ სააკაშვილი გლდანის მე-18 სამკურნალო დაწესებულებაში 8 ნოემბერს გადაიყვანეს.

სტრასბურგის სასამართლომ არ დააკმაყოფილა სააკაშვილის საჩივარი კერძო კლინიკაში გადაყვანასთან დაკავშირებით და შიმშილობის შეწყვეტა მოსთხოვა. მიხეილ სააკაშვილი შიმშილობის შესაწყვეტად გარკვეულ პირობებს აყენებს.