„ქართული ოცნების“ ერთ-ერთი ლიდერის სოზარ სუბარის შეფასებით, მიხეილ სააკაშვილის უკრაინაში დაკავების კადრები გაცილებით უფრო მძიმე იყო, ვიდრე საქართველოს პენიტენციური სამსახურის მიერ გავრცელებული კადრები, რომლის მიხედვით, სააკაშვილი სიტყვიერ და ფიზიკურ შეურაცხყოფას სამართალდამცავებს აქეთ აყენებს.

სოზარ სუბარი ასევე აცხადებს, რომ მას უკრაინის პრეზიდენტის განცხადებაში კრიტიკა არ დაუნახავს და საუბარი ორი მეგობარი ქვეყნის ხელმძღვანელების შორის შედგა, სადაც ორივე თავის პოზიციას გამოხატავდა.

“თუ ვსაუბრობთ ღირსების შელახვაზე, გავრცელებულ კადრებში ღირსების შელახვა და უფლებების დარღვევა არ ყოფილა. გაცილებით მძიმე კადრები იყო, როცა უკრაინაში მათი მოქალაქე მიხეილ სააკაშვილი დააკავეს. მაშინ, კარგად დავინახეთ, როგორ აღუკვეთეს თავისუფლება და როგორ ჩამოიყვანეს სახურავიდან, თუმცა უფლებების დარღვევას ვერც იმ ქმედებებშიც ვხედავ, რადგან ნებისმიერი ქვეყნის სამართალდამცავს აქვს უფლება გამოიყენოს ძალა, როცა მას მოქალაქე არ ემორჩილება“, - განაცხადა სოზარ სუბარმა.