თეა წულუკიანი მიხეილ სააკაშვილის შიმშილობასთან დაკავშირებით სტრასბურგის სასამართლოს გადაწყვეტილებას გამოეხმაურა. ვიცე-პრემიერის განცხადებით, წერილში არ არის საუბარი იმაზე, რომ მესამე პრეზიდენტი სამოქალაქო კლინიკაში უნდა იყოს გადაყვანილი.

„ჩვენი მიზანია სააკაშილი სასჯელს, რა თქმა უნდა, უსაფრთხო პირობებში და, რა თქმა უნდა, ჯანმრთელად. ვერავინ დააბრალებს ამ წერილს, რომ სააკაშვილი გადაყვანილი უნდა იყოს სამოქალაქო კლინიკაში - ამაზე ამ წერილში საუბარი არ არის. თუმცა, საუბარია იმაზე, რომ როგორც კი სააკაშვილი შეწყვეტს შიმშილობა, მას გაეწიოს სათანადო მკურნალობა და უზრუნველყოფილი იყოს ციხეში მისი უსაფრთხოება. ეს არის ელემენტარული, საბაზისო წესები პატიმართან მოპყრობის, რასაც ჩვენ ყოველთვის, ყველა პატიმართან მიმართებაში ვიცავდით და პენიტენციური სამსახური მომავალშიც დაიცავს“, - განაცხადა წულუკიანმა.

საქართველოს ყოფილი პრეზიდენტი, მიხეილ სააკაშვილი 1-ელ ოქტომბერს დააკავეს. პატიმრობაში მყოფმა სააკაშვილმა შიმშილობა გამოაცხადა. სააკაშვილის ადვოკატები და სახალხო დამცველი ყოფილი პრეზიდენტის სამოქალაქო საავადმყოფოში გადაყვანას ითხოვენ, იუსტიციის სამინისტრო კი აცხადებს, რომ #18 სასჯელაღსრულების (სამკურნალო) დაწესებულებაში სააკაშვილის მკურნალობისთვის ყველა აუცილებელი პირობა არსებობს.

6 ნოემბერს პენიტენციურმა სამსახურმა გაასაჯაროვა იმ პროდუქტების ამსახველი ფოტომასალა, რომლებითაც პატიმარი სააკაშვილი იკვებებოდა.

მიხეილ სააკაშვილი გლდანის მე-18 სამკურნალო დაწესებულებაში 8 ნოემბერს გადაიყვანეს.

სტრასბურგის სასამართლომ არ დააკმაყოფილა სააკაშვილის საჩივარი კერძო კლინიკაში გადაყვანასთან დაკავშირებით და შიმშილობის შეწყვეტა მოსთხოვა.

დღეს კი პენიტენციურმა სამსახურმა №18 დაწესებულებაში პატიმარ მიხეილ სააკაშვილის შესახლების, პალატაში განთავსების კადრები გაასაჯაროვა.