საზოგადოებას გვინდა ვაცნობოთ ერთ-ერთი მნიშვნელოვან სკანდალის შესახებ, რომელშიც გაეხვა „ნაციონალური „მოძრაობა“, ტელეკომპანია „მთავარი“ და კომპანია Ipsos-ი, - ამის შესახებ „ქართული ოცნების“ საზოგადოებასთან ურთიერთობის მდივანმა, შალვა პაპუაშვილმა განაცხადა. მისი თქმით, საუბარია Ipsos-ის კვლევის შედეგებზე, რომელიც „მთავარმა“ არხმა გამოაქვეყნდა და თავად კომპანიის ვებგვერდზეც გამოქვეყნდა.
როგორც იცით, გუშინ ,,მთავარ არხზე" გამოქვეყნდა IPSOS-ის კვლევის შედეგები. ეს შედეგები ასევე დაიდო IPSOS-ის ვებ-გვერდზე. ჩვენ ხშირად ვსაუბრობდით და ამას ფაქტებიც ადასტურებს, რომ ეს კვლევები იყო მანიპულირებული, ვინაიდან ყოველთვის დიდი აცდენა იყო, თუმცა ამ შემთხვევაში, ჩვენ პირდაპირ ვნახეთ, თუ როგორ ვერ დაიმალა ამ მანიპულაციის კვალი.
ვებ-გვერდზე გამოქვეყნებულ ინფორმაციაში ნახავთ, რომ ნაცვლად იმ მონაცემებისა, რომელიც გუშინ გამოქვეყნდა „მთავარ არხზე", სადაც ზუგდიდში, ანზორ მელიასთან დაკავშირებით გამოქვეყნდა 54,7 %, ხოლო მამუკა წოწერიასთან დაკავშირებით 45,3 %, ამ დოკუმენტში, რომელიც დევს IPSOS-ის ვებგვერდზე, წერია 51% მამუკა წოწერიას შემთხვევაში და 49% - ანზორ მელიას შემთხვევაში.
საინტერესოა, რომ სხვა მონაცემები თითქოს იგივეა, მაგრამ როგორც ჩანს თავად ეს დოკუმენტი მანიპულირებული იყო და შიგნით ჩარჩა ძველი მონაცემი, რომელიც ნამდვილ მონაცემს შეეფერება.
ეს კიდევ ერთხელ ადასტურებს, თუ როგორ ხდება წინასაარჩევნო კვლევებით მანიპულირება ამ შემთხვევაში, როგორც ჩანს ეს მანიპულაცია დოკუმენტში ბოლომდე ვერ წაიშალა და დარჩა კვალი, რომ თითქმის 5-6% -ია მანიპულაცია ზუგდიდში და მაშინ, როდესაც რეალური შედეგის მიხედვით იგებს „ქართული ოცნება" და მამუკა წოწერია, გადაკეთებული და მანიპულირებული შედეგით გაცხადდა ისე, თითქოს არჩევნებს იგებს ანზორ მელია. შეგახსენებთ, რომ ეს, როგორც მტკიცებულება დევს ვებგვერდზე და შეგიძლიათ ახლაც ნახოთ.
ჩვენ გვაქვს გამოცდილება ამ კვლევებთან დაკავშირებით. იცით, რომ შარშან, საპარლამენტო არჩევნების წინ გამოქვეყნებულ ბოლო კვლევებში „ქართულ ოცნებას" IPSOS-ის კვლევის შედეგად უნდა ჰქონოდა 38% მაშინ, როდესაც „ქართულმა ოცნებამ" რეალურად მიიღო 48% და ახლა, ადგილობრივი თვითმმართველობის არჩევნების წინ IPSOS-ის კვლევის შედეგად „ქართულ ოცნებას" ჰქონდა 35% მაშინ, როდესაც „ქართულმა ოცნებამ" მიიღო 47%.
ეს კიდევ ერთხელ ადასტურებს, წინასაარჩევნო კვლევების მანიპულაციის ფაქტს ამ შემთხვევაში IPSOS-ის მხრიდან ისევე, როგორც „მთავარი არხის" და „ერთიანი ნაციონალური მოძრაობის'' მხრიდან.
