ევროპის წამლის სააგენტო (EMA) Regeneron-ისა და Roche-ს მიერ შემუშავებული ანტისხეულების კოქტეილის (Ronapreve) მონაცემებს ავტორიზაციისთვის აფასებს.

ევროკავშირის მარეგულირებლის განცხადებით, ის პრეპარატის რისკებსა და სარგებელს შეაფასებს და დასკვნას ორი თვის განმავლობაში გამოიტანს.

Ronapreve-მ გადაუდებელი გამოყენებისთვის ავტორიზაცია 20-ზე მეტ ქვეყანაში, მათ შორის გაერთიანებულ სამეფოსა და შეერთებულ შტატებში მიიღო.

პრეპარატ Ronapreve-ს შეუძლია ხელი შეუწყოს ინფექციის თავიდან აცილებას, ინფექციის მძიმე სიმპტომების აღმოფხვრასა და ჰოსპიტალიზაციის შესაძლებლობის შემცირებას.

პრეპარატის შეყვანა ინექციით ან ინფუზიით ხდება. იგი სასუნთქი სისტემის ლორწოვან გარსზე მოქმედებს, სადაც მჭიდროდ ეკვრება კორონავირუსს და ხელს უშლის მას სასუნთქი სისტემის უჯრედებზე წვდომაში.

Ronapreve-ი იმ წამლების კლასს მიეკუთვნება, რომელსაც მონოკლონურ ანტისხეულებს უწოდებენ. ისინი სხეულის მიერ წარმოებული ბუნებრივი ანტისხეულების იმიტაციას ახდენენ. პრეპარატის გამოყენება ვაქცინაციის ჩანაცვლებას არ გულისხმობს.