სასამართლო „კლანს“ ეშინია, რომ “ქართულ ოცნებას” უკან დახევა მოუწევს. შესაბამისად, „კლანი“ აბობოქრდა და ცდილობს, რამენაირად შეინარჩუნოს კლანური მმართველობა მართლმსაჯულებაში, - აღნიშნული შეფასება ჟურნალისტებთან დეპუტატმა გიორგი ვაშაძემ გააკეთა.
ვაშაძის განცხადებით, “ქართული ოცნება” მოსამართლეების არჩევის პროცესს აჩქარებს, რადგან ჰგონია, რომ შეიძლება დასავლელმა პარტნიორებმა რეაგირება დააგვიანონ.
„თუ პროცესი ასე გაგრძელდა, სანქცია ნომერი ერთი იქნება - ყველა მაკროსაფინანსო დახმარებაზე წინაპირობები. თუ არ შეიცვლება “კლანი” და მართლმსაჯულების რეფორმა არ დაიწყება, კაპიკს ვეღარ მივიღებთ! სამწუხაროდ, ვიცით, რომ ვალებით ვცხოვრობთ. შემდეგ იქნება პერსონალური სანქციები. მმართველმა გუნდმა რაც არ უნდა იჩქაროს, კოვზი ნაცარში ჩაუვარდებათ. რატომ არის მნიშვნელოვანი, რომ ხელში შარლ მიშელის დოკუმენტი გვიჭირავს? იმიტომ, რომ სანქციების საფუძველი გახდება ამ დოკუმენტის შეუსრულებლობა. დოკუმენტს ჰყავს თავისი გარანტორი მხარე - ამერიკა და ევროკავშირი. როცა სანქციებზე იქნება საუბარი, დოკუმენტს აიღებენ და იკითხავენ, პუნქტი ნომერი ოთხი შეუსრულებელია? - იქნება სანქცია“, - განუცხადა ჟურნალისტებს გიორგი ვაშაძემ.
