ჩვენ ამ თვის ბოლომდე აუცილებლად დავასრულებთ საარჩევნო რეფორმას. მიღებული იქნება თვის ბოლომდე საარჩევნო კანონი. როცა არ უნდა ჩატარდეს არჩევნები ის ჩატარდება ახალი სისტემით, ანუ 120/30-ზე სისტემით, - ამის შესახებ „ქართული ოცნების“ ერთ-ერთმა ლდერმა ირაკლი კობახიძემ ტელეკომპანია „იმედის“ გადაცემა „ქრონიკაში“ განაცხადა.

მისი თქმით, „ქართული ოცნება“ ყველა მიმართულებით მიესალმება იმას, რომ საერთო სიები შეადგინონ ოპოზიციის წარმომადგენლებმა, ან საერთო კანდიდატები დააყენონ. „იმიტომ რომ ძალიან მარტივი საარჩევნო დათვლაა, რომ ჩვენ ამ შემთხვევაში გვეძლევა დამატებით საკმაოდ დიდი უპირატესობა. კერძოდ, პროპორციულ ნაწილში ეს შეიძლება იყოს 5%-იანი უპირატესობა გაერთიანების შემთხვევაში. მაჟორიტარი კანდიდატების შემთხვევაში უპირატესობა გულისხმობს იმას, რომ ჩვენ გაგვიმარტივდება, არა მეორე ტურში, არამედ პირველივე ტურში არჩევნების მოგებას. ასეთ კოლაბორაციას, ჩვენ მხოლოდ მივესალმებით“- აღნიშნა კობახიძემ. .

ის 2020 წლის არჩევნებზე ერთიან ოპოზიციას საფრთხედ არ განიხილავს, რადგან მიაჩნია, რომ ოპოზიცია ოფიციალურად გაფორმდება როგორც პრორუსული და რუსეთის მიმართ ლოიალური. „ერთიანი ოპოზიცია, ეს არის სააკაშვილი, ბოკერია, ბურჯანაძის ერთობა. თქვენ წარმოიდგინეთ რამდენი ადამიანი მისცემს ხმას ასეთ უკვე გაფორმებულ პრორუსულ კოალიციას. ანტიდასავლურები რომ იყვნენ ვიცოდით, მაგრამ ეს ანტიდასავლური გაფორმდება პრორუსულად, რუსეთის მიმართ ლოიალურ ოპოზიციად. ეს მხოლოდ და მხოლოდ მომგებიანია ჩვენთვის“, - აღნიშნა კობახიძემ. .