კალაძე კონგრესმენების წერილებზე: კატეგორიულად მიუღებელია ეს ტონი და ასეთი ტიპის განცხადებები

კალაძე კონგრესმენების წერილებზე: კატეგორიულად მიუღებელია ეს ტონი და ასეთი ტიპის განცხადებები

თბილისის მერმა კახა კალაძემ ჟურნალისტებს ამერიკელი კონგრესმენების წერილების სერიასთან დაკავშირებით განუცხადა, რომ განცხადებები, რომელსაც ვისმენთ, ცდება ყოველგვარ მეგობრულ ურთიერთობას.

მისი თქმით, კატეგორიულად მიუღებელია ეს ტონი და ასეთი ტიპის განცხადებები.

„განცხადებები, რომელსაც ჩვენ ვისმენთ ცდება ყოველგვარ ჩვენს მეგობრულ ურთიერთობას. იცით, რომ ამერიკა არის ჩვენი სტრატეგიული პარტნიორი ქვეყანა, შესაბამისად, სტრატეგიული პარტნიორის კანონმდებლები ასე არ უნდა ესაუბრებოდნენ მეგობარ ქვეყანას. მითუმეტეს, როდესაც საქმე ეხება ერთი საეჭვო რეპუტაციის მქონე კომპანიას. ჯერ კიდევ ჩემი მინისტრობის დროს არსებობდა ეს პრობლემა და ძალიან კარგად ვიცი რას წარმოადგენს ეს კომპანია. მხედველობაში მაქვს „ფრონტერა“. ჩვენ დავიწყეთ საარბიტრაჟო საქმის წარმოება და დარწმუნებული ვარ, კარგად იციან, რომ ისინი აუცილებლად წააგებენ ამ საქმეს, რის გამოც თავიანთი ლობიზმი გააძლიერეს. თუმცა, ჩვენ აუცილებლად დავიცავთ ჩვენი ქვეყნის სახელმწიფო ინტერესებს და აუცილებლად დავიცავთ ჩვენს კომპანიებს, როდესაც მართალი ვართ. ზუსტად ამიტომ არის საქმე არბიტრაჟში, განიხილება და დარწმუნებული ვარ, ნავთობის და გაზის კორპორაცია ამ დავაში გაიმარჯვებს. კატეგორიულად მიუღებელია ეს ტონი და კატეგორიულად მიუღებელია ასეთი ტიპის განცხადებები“, - განაცხადა კალაძემ.

შეგახსენებთ, ოთხმა კონგრესმენმა პრემიერ-მინისტრ გიორგი გახარიას წერილი 22 იანვარს გაუგზავნა. პრემიერმა წერილი 25 იანვარსაც მიიღო.

რესპუბლიკელი კონგრესმენი მარკუეინ მალინი გიორგი გახარიასადმი 19 იანვარს გაგზავნილ წერილში „საქართველოს დემოკრატიული ღირებულებებისგან გადახვევითა და ეკონომიკის გაუარესებით“ შეშფოთებულია.