გამოვთქვამ ძალიან დიდ წუხილს იმის გამო, რომ ასე ვთქვათ, ემოციებმა ჩემზე მოახდინა მოქმედება და დავწერე ის, რაც დავწერე, - ამის შესახებ თბილისის საკრებულოს წევრმა „ქართული ოცნებიდან“, ერეკლე კუხიანიძემ „ტვ პირველის“ ეთერში  განაცხადა.

კუხიანიძემ აღნიშნა, რომ ექიმ ვაჟა გაფრინდაშვილზე პოსტის დაწერის დღეს მას გარკვეული სტრესი ჰქონდა.

„ის, რაც მოხდა, იგივე ჩემი რეაგირება, აღვნიშნე კიდეც „ფეისბუქში“, მეორე დღეს სხვათა შორის, თუმცა დილიდანვე მინდოდა, რეაგირება გამეკეთებინა და შემეცვალა რაღაცები, რაც მიმაჩნია, რომ არ იყო სწორი. მაგრამ ისეთი რაღაც დამხვდა „ფეისბუქზე“, ისეთი შეურაცხმყოფელი და სასწაული წყევლები, ბავშვებზე, მშობლებზე, საფლავების ტრიალი, რომ არ ვიცი, გადაცდა ყოველგვარ ზღვარს. დაველოდე ასე ვთქვათ ის დღე, რომ არ გამოსულიყო ისე, რომ შეეშინდა, მოხსნა და ა.შ. დაველოდე, რომ მიმეღო რეზულტატი ჩემი ქმედების. საღამოს შევცვალე და დავწერე, რომ არ არის სწორი ემოციური და გაღიზიანებული მდგომარეობები და დავწერე ისე, ვთქვათ როგორ დავწერდი, რომ არ ვყოფილიყავი იმ დღეს სტრესში და რაღაცას არ გამოვეყვანე მდგომარეობიდან. რა თქმა უნდა, იქ არ იყო უხეშობა, იქ არ იყო დედის მოხსენება, ჩემთვისაც ძალიან უსიამოვნო და მიუღებელია, პირდაპირ გეტყვით“, - განაცხადა კუხიანიძემ.

საკრებულოს წევრმა ხაზი გაუსვა, რომ ის თავის მიერ დაწერილი სიტყვების გამო წუხს.

მან წამყვანის კითხვაზე, იხდის თუ არა ბოდიშს, დადებითი პასუხი გასცა.

„რა თქმა უნდა. ბოდიშს ვიხდი იმ გამოთქმისთვის, არაკორექტურობისთვის. შინაარსი იყო, რომ ის ადამიანი გადავიდა და იცოდა, რას აკეთებდა. მან იცოდა, რა რისკზე მიდიოდა და მე არ შემიფასებია, ეს ცუდია თუ კარგია. შემდეგ მე დავწერე, რომ ჩვენი მთავრობა ყველაფერს აკეთებს, არამედ მთელი მსოფლიოს საზოგადოებაა ამაში ჩართული და მაქსიმუმს აკეთებს. ამ ფონზე, როდესაც ჩვენმა მთავრობამ მიიღო ისეთი შეფასება ოჯახის მხრიდან, რომ არ კეთდება საკმარისი და ეს მთავრობაა ის მთავრობა, რომელიც იმის მაგივრად, რომ დაეხმაროს, ტაშ-ფანდურს მართავს და ეზეიმება, როცა არაფერი საზეიმო არ არის, ამან ჩემზე ძალიან მძიმე გავლენა მოახდინა“, - განაცხადა კუხიანიძემ ტელეკომპანია „პირველის“ ეთერში.

შეგახსენებთ, დღეს, 16 დეკემბერს, თბილისის საკრებულოსთან საკრებულოს წევრის ერეკლე კუხიანიძის თანამდებობიდან გადაყენებისა და საკრებულოს დეპუტატის მანდატის დატოვების მოთხოვნით საპროტესტო აქცია გაიმართა. როგორც აქციის დასრულების შემდეგ გახდა ცნობილი, საკრებულოს უმრავლესობა მის საკითხზე კონსულტაციებს 17 დეკემბერს გამართავს.

თბილისის საკრებულოს წევრმა ერეკლე კუხიანიძემ საოკუპაციო ძალების მიერ გატაცებული ექიმის ვაჟა გაფრინდაშვილისა და მისი ოჯახის მისამართით შეურაცხმყოფელი პოსტი 13 დეკემბერს გაავრცელა და მათ „პროვოკატორები“ და „იდიოტები“ უწოდა.