"ხელისუფლებაში ყოფნისას კვირიკაშვილს გადატრიალებული სიტყვაც კი არ უთქვამს ივანიშვილზე"

მამუკა ხაზარაძის თქმით, ის ყოფილ პრემიერს გიორგი კვირიკაშვილს კარგად იცნობს, თუმცა უარყოფს ინფორმაციას, რომ მის პოლიტიკურ გეგმებთან კვირიკაშვილს რაიმე საერთო აქვს.

ამის შესახებ ის „პალიტრანიუსის“ ეთერში საუბრობს.

“არაფერი დასამალი არ მაქვს. გიორგიზე ყოველთვის დადებითი აზრის ვიქნები იმიტომ, რომ ის არის ქართველი, წესიერი, პატიოსანი ადამიანი. მისი ხელისუფლებაში ყოფნის დროს, არასდროს, გადატრიალებული სიტყვაც კი არ უთქვამს ბიძინა ივანიშვილზე. ჩვენ არასდროს გვქონია პოლიტიკურ თემებზე საუბარი, უბრალოდ, არ მაინტერესებდა ეს თემა. გიორგისთან არასდროს მქონია პოლიტიკურ თემებზე საუბარი, არც ჩვენი გეგმები იცის. ის არის ქვეყანაზე შეყვარებული ადამიანი, წარმატებული იყო თუ არა პრემიერად, ეს სხვამ შეაფასოს. ის პოლიტიკოსი იყო, ვიდრე „ქართუში“ დაიწყებდა მუშაობას. აქ გიორგიზე არ არის საუბარი, აქ საუბარია აბსურდის თეატრზე, რომ თურმე შეიძლება რაღაცაზე მიგაწებონ და შემდეგ უნდა გამოხვიდე და თავი იმართლო. დასამალი არაფერი მაქვს. ჭორაობა უნდა მორჩეს. თუ მექნებოდა რაიმე ჩანაფიქრი გიორგისთან აუცილებლად ვიტყოდი. რისი ფარული ჩანაწერები? ეს არის სისულელე. რომ მე და გიორგი გავედით სადღაც და ვლაპარაკობდით პოლიტიკური პარტია შევქმნათო, როცა კაცი პრემიერ-მინისტრი იყო? მსგავსი საუბრები არ არსებობს, თუ არსებობს მოგვასმენინონ“,- განაცხადა ხაზარაძემ.