„როდესაც სადმე წავიდოდი, მანქანა მომყვებოდა, ჩემი შვილები სკოლაში ვერ დადიოდნენ, დვალს მხოლოდ ჩემს სახლამდე შეეძლო მოსვლა, ტელეფონები ისმინებოდა - როცა ადეიშვილს ვკითხეთ, ამას რატომ გვიკეთებდნენ, აბა, რა გგონიათ, დათმეთ წილები და ყველაფერი დასრულდებაო“, - ამის შესახებ „რუსთავი 2“-ის ერთ-ერთმა დამფუძნებელმა, ჯარჯი აქიმიძემ „პალიტრანიუსის“ ეთერში, გადაცემაში „360 გრადუსი“ განაცხადა.

წამყვანის კითხვაზე, თუ დაათმობინეს მას და დათო დვალს „რუსთავი 2“-ის წილები, აქიმიძემ განმარტა, რომ იყო სხვადასხვა სახის ზეწოლა.

„2004 წელს, რესტორან „მეგრელებში“ მე და დათო დვალს, მის დაბადების დღეზე შეგვხვდნენ ადეიშვილი და მერაბიშვილი, რომელთაც გამოგვიცხადეს, რომ მათ ტელევიზია სჭირდებოდათ და უნდა დაგვეთმო. ჩვენ უარი ვთქვით. ამის მერე გვქონდა დიდი ხანი მათთანაც ურთიერთობა, რაშიც ოქრუაშვილი არ ყოფილა. როგორ დაგვათმობინეს? მაგალითად, ჩემი სახლის წინ იდგა ორი მანქანა. წავიდოდი მარჯვნივ, მომყვებოდა ერთი, წავიდოდი მარცხნივ, მომყვებოდა მეორე მანქანა. ჩემი შვილები სკოლაში ვერ დადიოდნენ, რადგან იყო მუდმივი სტრესი. დათო დვალს შეეძლო, სახლიდან მოსულიყო მხოლოდ ჩემს სახლამდე. ტელეფონები ისმინებოდა ისე, რომ არც ერიდებოდათ. როცა ვიკითხეთ ადეიშვილთან მისივე კაბინეტში, რატომ გვიკეთებდნენ ასეთ რაღაცას, აბა, რა გგონიათო, დათმეთ წილები და ყველაფერი დასრულდებაო.

კი ბატონო, ციხეში არ ჩავუყრივართ, ფრჩხილები არ დაუძრიათ და ა.შ. მაგრამ რაც გაგვიკეთეს, ის არ იყო საკმარისი? და რატომ გაგვიკეთეს, დიდი ბოდიში, იმიტომ, რომ ყველაფერი გავაკეთეთ, რომ ისინი მოსულიყვნენ ხელისუფლებაში? არსანიძეს გადავუფორმე, ეს იყო ადამიანი, რომელიც იყო სულ გაუგებრობაში, აფახურებდა თვალებს, წარმოდგენა არ ჰქონდა, რას აკეთებდა. მოაწერინეს ხელი, უთხრეს, თავისუფალი ხარო და გავიდა ოთახიდან“, - განაცხადა აქიმიძემ.