გიორგი გახარიას გადადგომის მოთხოვნით სახელმწიფო ინსტიტუტების ძალადობრივი შტურმით აღების მცდელობის გამართლებას ცდილობენ

გიორგი გახარიას გადადგომის მოთხოვნით სახელმწიფო ინსტიტუტების ძალადობრივი შტურმით აღების მცდელობის გამართლებას ცდილობენ

ის, ვინც დღეს მინისტრ გახარიას გადადგომას ითხოვს, ცდილობს სახელმწიფო ინსტიტუტების ძალადობრივი შტურმით აღების მცდელობა ნაწილობრივ მაინც გაამართლოს, - ამის შესახებ თავდაცვის მინისტრმა ლევან იზორიამ განაცხადა.

მინისტრის თქმით, 20 ივნისს აქციისას შინაგან საქმეთა სამინისტრო და მინისტრი კონსტიტუციისა და კანონის დაცვის ვალდებულების შესაბამისად მოქმედებდნენ.

„ნაციონალურ მოძრაობას“ და მის ყველა ფრთას აქვს სურვილი საზოგადოება შეცდომაში შეიყვანოს თითქოს არაპროპორციული ძალა იყო გამოყენებული, რაც შს მინისტრის გუშინდელი გამოსვლით სრულიად გაბათილდა. 20 ივნისს აქციისას შინაგან საქმეთა სამინისტრო და მინისტრი მოქმედებდნენ კონსტიტუციისა და კანონის დაცვის ვალდებულების შესაბამისად. სახელმწიფოს ვალდებულებაა, ერთი მხრივ, გამოხატვის თავისუფლების დაცვა და, მეორე მხრივ, მართლწესრიგის უზრუნველყოფა. პოლიციამ უზრუნველყო ორივე ვალდებულების შესრულება. ყველა კითხვა შესაძლო გადაცდომებზე აუცილებლად უნდა იყოს და მე დარწმუნებული ვარ, იქნება პასუხგაცემული. თუმცა ყველას უნდა გვახსოვდეს, რომ პირველ რიგში ქვეყნისთვისაა საშიში პოლიციის დელეგიტიმაციის მცდელობა, რასაც ოპოზიციის დიდი ნაწილი დღეს რეალურად აკეთებს. ნებისმიერი ასეთი მცდელობა არის ანტისახელმწიფოებრივი განზრახვა, ვინაიდან პირდაპირ ემსახურება ქვეყანაში დესტაბილიზაციის უზრუნველყოფას“, - განაცხადა იზორიამ.