საპრეზიდენტო კანდიდატმა ვლადიმირ ზელენსკიმ და მისმა ოპონენტმა, მოქმედმა პეზიდენტმა პეტრო პოროშენკომ, მეორე ტურის წინ ნარკოტიკზე და ალკოჰოლზე სამედიცინო შემოწმება გაიარეს.

ვლადიმირ ზელენსკი კლინიკა "ევროლაბში" ჟურნალისტებთან ერთად მივიდა და პირდაპირ ეთერში აიღო ანალიზი, ხოლო პოროშენკომ ეს პროცედურა ანტიდოპინგის ცენტრ "ოლიმპისკიში" პრესის და ტელევიზიის თანდასწრებით გაიარა, სადაც წინასაარჩევნო დებატები უნდა გაიმართოს.

ორი დღის წინ ვლადიმირ ზელენსკიმ საკუთარ ფეისბუქზე გამოაქვეყნა ვიდეორგოლი, სადაც ის დებატებში იწვევს მოქმედ პრეზიდენტს პეტრო პორიშენკოს და მას რამდენიმე პირობას უყენებს.

ზელენსკიმ განაცხადა, რომ დებატები უნდა წარიმართოს საფეხბურთო მოედან ოლიმპიურზე და მედიამ პირდაპირი ეთერით გააშუქოს, მანამდე კი მონაწილეებმა უნდა გაიარონ სამედიცინო შემოწმება და დაამტკიცონ, რომ ნარკოტიკის და ალკოჰოლის მომხმარებელი არ არიან.

"ძალიან მნიშვნელოვანია თუ როგორი იქნება შედეგები იმ დებატებისა, რომელიც დაანონსებულია ზელენსკისა და პოროშენკოს შორის და რომლის ძირითადი აზრი სწორედ იმაში მდგომარეობს, რომ მოსახლეობა უფრო ახლოს გაეცნოს თითოეული ამ კანდიდატის წინასაარჩევნო პროგრამას და შესაძლოა ამანაც გარკვეულწილად სიცხადე შეიტანოს ამომრჩევლისთვის," - აღნიშნავს საქართველოს პოლიტიკის ინსტიტუტის დირექტორი კორნელი კაკაჩია "რეზონანსთან" საუბრისას.

"პოროშენკოს ძალიან გაუჭირდება ამ არჩევნების მოგება იქიდან გამომდინარე, რომ მიუხედავად პატრიოტული რიტორიკისა, რომელსაც იგი მიმართავს და თითქოს პროდასავლური პოლიტიკოსის იმიჯისა, მას ძალიან უფუჭებს სახელს კორუფციულ სქემებში გახვევა, მისი სახელი საკმაოდ შებღალულია და ეს შეიძლება გახდეს მისი აქილევსის ქუსლი, რომელმაც შეიძლება გადაწყვიტოს კიდეც ბედი.

"რაც შეეხება ზელენსკის, მას, მართალია, დიდი უპირატესობა აქვს, მაგრამ რთული შეკითხვები იქნება მის კავშირზე ოლიგარქიულ წრეებთან და კონკრეტულად ერთ ოლიგარქთან, რომელიც მას უჭერს მხარს და ასევე მისი გამოუცდელობა რომელიც საკმაოდ მნიშვნელოვანი ფაქტორი შეიძლება იყოს და დასაფიქრებელი იყოს ამომრჩევლისათვის," -აცხადებს კაკაჩია.

უკრაინაში საპრეზიდენტო არჩევნების მეორე ტური 21 აპრილს გაიმართება, რომელშიც უკრაინის მოქმედი პრეზიდენტი პეტრო პოროშენკო და შოუმენი ვლადიმირ ზელენსკი იბრძოლებენ, მანამდე კი დაანონსებული დებატები უკრაინის საპრეზიდენტო კანდიდატებს შორის კიევის საფეხბურთო მოედან "ოლიმპიურზე" 19 აპრილს გაიმართება.