„ბიძინა ივანიშვილს უზარმაზარი ფინანსური რესურსი, 3 მილიარდი დოლარი აქვს დახარჯული ქველმოქმედებაზე საქართველოში. მისი ქველმოქმედების შედეგია, რომ ასობით ტაძარი და კულტურული მემკვიდრეობის ძეგლი რეაბილიტირდა და შეუნაჩუნდა მომავალ თაობას" – აცხადებს პრაიმთან ექსკლუზიურ ინტერვიუში „ქართული ოცნების" პოლიტიკური მდივანი ირაკლი ღარიბაშვილი.

მისი თქმით, ბიძინა ივანიშვილის ქველმოქმედების შედეგია, რომ კულტურის სფეროში მოღვაწე ადამიანებს ჰქონდათ საშუალება მეტ-ნაკლებად ღირსეული ანაზღაურება მიეღოთ, რამაც მნიშვნელოვანწილად შეუწყო ხელი ამ დარგში ნიჭიერი ადამიანების შენარჩუნებას, ახალი კადრების მოზიდვას და ღვაწლმოსილი ადამიანების შეძლებისდაგვარად დაფასებას.

„გახსოვთ, მეც "ქართუ ფონდში" ვმუშაობდი და კარგად მახსოვს რა ძალისხმევა იხარჯებოდა და რა მასშტაბის იყო ეს ქველმოქმედება. შესაბამისად, გადმოცემით არ ვიცი რა მასშტაბებზეა საუბარი და არავითარი აუდიტის დასკვნა მე არ მჭირდება ამ ქველმოქმედების შედეგების შესაფასებლად. როდესაც სამ მილიარდზე ვსაუბრობთ ეს იმხელა თანხაა ქველმოქმედებისთვის,   რომ  ეხება ყველა რეგიონს, ასობით კულტურული მემკვიდრეობის ძეგლს, ასობით ინფრასტრუქტურულ პროექტს, ტურისტულ ინფრასტრუქტურას სხვადასხვა რეგიონში და ათობით ათას ადამიანს, რომელიც პირდაპირ, თუ ირიბ სარგებელს იღებს ამ მასშტაბური ქველმოქმედებიდან" - აცხადებს პარტიის პოლიტიკური მდივანი.  

https://primetime.ge/news/1554467971-%E1%83%AB%E1%83%90%E1%83%9A%E1%83%98%E1%83%90%E1%83%95%E1%83%98%E1%83%9A%E1%83%98-Ecxlusive?fbclid=IwAR1xc3K81VlXmWilR6RzKai7S79OW_pVOVqAg3r2QjPzxQNm8Vx1-6yNZtM