საეჭვო ხასიათის არასამთავრობო ორგანიზაციებს, მით უფრო, რომლებიც ფინანსდებიან საზღვარგარეთული გრანტებით, არ უნდა ჰქონდეთ უფლება, რომ ჩაერიონ იმ დიდ საგანძურში, რომელსაც ქართული ოჯახი და მისი ტრადიცია ჰქვია, – განაცხადა დეკანოზმა დავით ისაკაძემ, რომელიც პარლამენტში, ადამიანის უფლებათა დაცვის კომიტეტის სხდომას ესწრებოდა, სადაც ბავშვთა კოდექსს განიხილავდნენ.

„შეიძლება საუკეთესო ინტერესი მოზარდისთვის, 15-16 წლის ბავშვისთვის იყოს მარიხუანას მოხმარება. როგორ ვაპირებთ ჩვენ ამ საკითხის მოწესრიგებას ამ კოდექსის საფუძველზე?“ – მიმართა დეკანოზმა დეპუტატებს.

მისივე თქმით, ტელევიზიით კაზინოების, ტოტალიზატორების, ონლაინ თამაშების რეკლამის ნიაღვარი მოედინება და ეს საკითხი დასარეგულირებელია.

„რეკლამები არის სპორტული და საინფორმაციო ხასიათის გადაცემების დროს, სპორტს ასევე უყურებენ მოზარდებიც, ბავშვებიც და ასევე საინფორმაციო ხასიათის გადაცემებსაც უსმენენ. ეს უნდა იყოს დარეგულირებული. მშობლის პრიორიტეტული ცნების განსაზღვრასთან დაკავშირებით მინდა ვთქვა, საეჭვო ხასიათის არასამთავრობო ორგანიზაციებს, მით უფრო, რომლებიც ფინანსდებიან საზღვარგარეთული გრანტებით, არ უნდა ჰქონდეთ უფლება, რომ ჩაერიონ ამ დიდ საგანძურში, რომელსაც ქართული ოჯახი და მისი ტრადიცია ჰქვია. თუ ისინი იქნებიან ჩარეული არასწორად, არა აქვთ მათ ამის უფლება, რომ ჩემს ოჯახში და პრინციპებში, მშობლისა და შვილის დამოკიდებულებაში ისინი განსაზღვრავდნენ რაღაც მორალს, ზნეობას და დამოკიდებულებას“, – განაცხადა დავით ისაკაძემ.