ჯანდაცვის მინისტრი გამოეხმაურა გადაცემა “პროფილში” გასულ ისტორიას, რომელმაც ბოლო დღეებში სოციალური ქსელი მოიცვა:
"მართლაც ძალიან შემტკივა გული ამ შემთხვევაზე. ის, რაც გააკეთა სახელმწიფომ, ცხადია, საკმარისი არ არის, მაგრამ ამ ქალბატონს სახელმწიფომ გადასცა ორი ბინა – სამოთახიანი და ერთოთახიანი. სამწუხაროდ, ეს ადამიანი ვერ ახერხებს რაღაც კომუნიკაციის მოგვარებას, რომ გადავიდეს. როცა ასეთი მტკივნეული თემის გაშუქება ხდება აუცილებლად უნდა იყოს გათვალისწინებული იმ უწყების პოზიცია, რომელსაც ეხება ეს თემა", – განაცხადა სერგენკომ.
მრავალშვილიანი დედის, ლალა ცინდელიანის მონათხრობმა გულგრილი არავინ დატოვა. დევნილი ქალი ყვებოდა, რომ შვიდი შვილით პოლიციის მიტოვებულ შენობაში უმძიმეს პირობებში ცხოვრობს, თუმცა სატელევიზიო არქივში ასევე ინახება გასულ წელს გადაღებული კადრები, რითიც ირკვევა, რომ ზუსტად ერთი წლის წინ დევნილთა სამინისტრომ მოქალაქე ლალა ცინდელიანს ერთდროულად ორი სახლის გასაღები გადასცა.
"პრაიმტაიმთან" საუბარში ლალა ცინდელიანს გადაცემა "პროფილისკენ" იშვერს ხელს:
"იმ სამოთახიან ბინაში იმიტომ არ ვცხოვრობ, რომ პირობები არ არის, სასმელი წყალი არ ვარგა, კანალიზაცია მოშლილია. აქ გაცილებით უკეთესი პირობები მაქვს. ჩემი ხელით გავაკეთე კანალიზაცია. იქ, რომ გადავიდე ბავშვებს სასმელი წყალი უნდა ვუყიდი, მაგის ფული არ არის. ბინა რომ გადმომცეს, იმ გადაცემაშიც ვთქვი, მაგრამ ეგ ნაწილი ამოჭრეს. მე დასამალი არაფერი მაქვს. დახმარების ნაცვლად მაგ გადაცემით გამოვიდა, რომ პირიქით, ხალხის მხრიდან აქეთ გავილანძღე", – ამბობს ლალა ცინდელიანი.
