პარლამენტის შენობის წინ განთავსებულ კარვებში ზაზა სარალიძის მხარდამჭერთა ნაწილი აღარ იმყოფება. არსებული ინფორმაციით, აღნიშნულის მიზეზი ზაზა სარალიძისა და მალხაზ მაჩალიკაშვილის მხარდამჭერებს შორის მომხდარი გარკვეული უთანხმოებაა.
აღნიშნულთან დაკავშირებით Ambebi.ge აქციის ერთ-ერთ მონაწილეს, გიორგი მათიაშვილს დაუკავშირდა, რომელმაც კომენტარის გაკეთება არ ისურვა. აღნიშნულზე საუბრისგან თავი შეიკავა ხორავას ქუჩაზე მოკლული დავით სარალიძის მამა, ზაზა სარალიძემაც, თუმცა მისი მხარდამჭერების კარვებიდან წამოსვლის ფაქტი არ უარყო.
კითხვაზე, თუ რატომ აღარ ჩანს პარლამენტის წინ აქციაზე თავად ზაზა სარალიძე, აღნიშნულს მის ჯანმრთელობის მდგომარეობას უკავშირებს.
"პარლამენტთან ვართ ჩვეულებრივად, უბრალოდ ჯანმრთელობის მხრივ მაქვს პრობლემები, ვმკურნალობ და ეს ყველაფერი მიშლის ხელს. რაც შეეხება კონკრეტულ ადამიანებს, რომლებიც ჩემს გვერდით არიან, თუ რატომ აღარ იმყოფებიან კარვებში, ამ კითხვის პასუხისგან თავს შევიკავებ", - განაცხადა ზაზა სარალიძემ.
რაც შეეხება მალხაზ მაჩალიკაშვილის განცხადებას, რომ ერთი კარავი შესაძლოა, მთავარ პროკურატურასთან დადგან, სარალიძის თქმით, ინფორმაციას არ ადასტურებს.
თავის მხრივ, ზაზა სარალიძესთან რაიმე ტიპის უთანხმოებას უარყოფს მალხაზ მაჩალიკაშვილი. როგორც გარდაცვლილ თემირლან მაჩალიკაშვილის მამამ განაცხადა, მასსა და ზაზა სარალიძეს შორის უთანხმოება არ მომხდარა და ორივე ერთად აგრძელებს ბრძოლას სამართლიანობის აღდგენისთვის.
ფაქტთან დაკავშირებით, ინფორმაციას არ ფლობს აქციის კიდევ ერთი მონაწილე, გიორგი ოლქიევი. იგი აღნიშნავს, რომ ის ადგილზე არ იმყოფება და უთამნხმოების შესახებ არაფერი სმენია, თუმცა არ უარყოფს, რომ აქციას იმ ადამიანთა ნაწილი გამოაკლდა, რომელებიც ზაზა სარალიძის გვერდით პირველივე დღეებში გამოჩდნენ და რომელთა ნაწლიც, აქციის საორგანიზაციო საკითხებსა და სარალიძის უსაფრთხოებას კურირებდა.
