სოციალურ ქსელში გავრცელებულ ვიდეოს, სადაც ჩანს, რომ საოპერო მომღერალი პაატა ბურჭულაძე, რუს მომღერლებთან ერთად, რუსეთს ახალ წელს ულოცავს, რეჟისორი რობერტ სტურუა ეხმაურება:

“ასე გაბითურებენ ნაცისტები… ჩვენ ლაყე ხალხს გამჭრიახობა როდის ჰქონდა?! ქართველს ხომ ერთი ველური შური ამოძრავებს – ფული. და იმ კაცს ვერ იტანს, ვინც უანგაროდ ეხმარება, ვინც გადაარჩინა ჩვენი ქვეყანა. თორემ ნახავდით რა სისხლიანი ფუეტეებს დაატრიალებდნენ სააკა თავისი ზონდერ КГБ-ს ბანდ-“ოპოზიციით” ჩრდილოეთის კბილგალესილ მეზობლების დახმარებით! ამ-ამ-ამ.“, – წერს სტურუა “ფეისბუქის” გვერდზე.

ამასთან, პაატა ბურჭულაძემ 15 დეკემბერს რუსეთის ქალაქ სანქტ-პეტერბურგში დირიჟორ იური ტემირკანოვისადმი მიძღვნილ კონცერტზე იმღერა, რომელსაც ვლადიმერ პუტინი ესწრებოდა. დირიჟორ იური ტემირკანოვის 80 წლის იუბილეზე, კონცერტზე მყოფი აუდიტორიის, მათ შორის, ვლადიმერ პუტინის წინაშე პაატა ბურჭულაძემ ზაქარია ფალიაშვილის ოპერიდან “დაისი” ერთ-ერთი არია – “ღვინოვ კახურო” შეასრულა.

საოპერო მომღერალსა და პოლიტიკოსს საქართველოში აკრიტიკებს როგორც ხელისუფლების, ასევე, ოპოზიციის დიდი ნაწილი.

რუსეთის ქალაქ სანქტ-პეტერბურგში გამართულ კონცერტში მონაწილეობასთან დაკავშირებით პაატა ბურჭულაძე განცხადებაც გაავრცელა:

“ამდენი სიძულვილის დათესვა თუ შეიძლებოდა საქართველოში ვერასდროს ვიფიქრებდი, მაგრამ ის რაც დღეს ააგორეს, 2009 წელს უკვე გამოვიარე. ერის მოღალატედაც ვიყავი გამოცხადებული შეზღუდული შესაძლებლობების მქონე ბავშვების დასახმარებლად მოსკოვში გამართული საქველმოქმედო კონცერტის გამო. ამჯერად, მსოფლიოს უდიდესი მაესტროსა და ჩემი დიდი ხნის მეგობრის, იური ტემირკანოვის 80 წლის იუბილისადმი მიძღვნილ გალა-კონცერტში ვიღებდი მონაწილეობას მისივე პატივსაცემად და მისივე მიწვევით.

აუცილებლად ჩავალ და მივულოცავ დიდ მაესტროს ყველა მომდევნო იუბილესაც. მთელი ცხოვრება მემახსოვება და მისი მხარდაჭერის მადლიერი ვიქნები. ომის შემდეგ, როდესაც ბევრი ჩემი კოლეგა თავს იკავებდა საქართველოში ჩამოსვლისგან იური ტემირკანოვი 2013-ში მთელი თავისი ორკესტრით ჩამოვიდა თბილისში და საქველმოქმედო კონცერტი გამართა ქართველი ბავშვების დასახმარებლად. 2008 წელსაც იყო ჩამოსული ჩემს იუბილეზე და სხვათაშორის, მაშინდელი საქართველოს პრეზიდენტი მიხეილ სააკაშვილი ესწრებოდა კონცერტს, მიუხედავად დაძაბული ვითარებისა, არავის უთქვამს, რომ ტემირკანოვი და მისი ორკესტრი უკრავდა სააკაშვილისთვის.

აქვე უნდა აღვნიშნო, რომ ისეთ დიდ ხელოვანებს როგორიც იური ტემირკანოვია, ყველა ქვეყანაში, მათ შორის ქვეყნის პირველი პირები, განსაკუთრებულ პატივს სცემენ.

ბოლო წლებმა დამარწუნა, რომ ადამიანს ადამიანისთვის არათუ ტალახის სროლა, პირდაპირი გაგებით ხორცის გლეჯვაც შეუძლია. ვეღარაფრით გამაკვირვებს ვერც ერთი „დიდი პატრიოტი“. კიდევ ერთხელ ვიმეორებ, იური ტემირკანოვის იუბილეზე მომავალშიც აუცილებლად ჩავალ და თავს დავუკრავ ყველა დიდ ხელოვანს, მით უფრო, ვისაც ასეთი სიკეთე და მეგობრობა აკავშირებს საქართველოსთან.

მთელი ჩემი ცხოვრება როგორც შემეძლო ვემსახურე ჩემს ქვეყანას და იმ თითოეულ ქართველს, ვისაც ჩემი თანადგომა სჭირდებოდა. ბევრი სითბო და სიყვარულიც მიმიღია, რისთვისაც ყოველთვის მადლიერი ვიქნები და ვისაც არ მოვწონვარ ან არ მოსწონს ჩემი ცხოვრების წესი, ვუსურვებ თავად შექმნან უკეთესი.

და საერთოდ, ჩემს წინააღმდეგ კამპანიების აგორებაში დახარჯული ფული, დრო და ძალისხმევა, სჯობს ქვეყნის გადარჩენისკენ მიმართოთ, რომელიც თავზე გვენგრევა“, – აცხადებს პაატა ბურჭულაძე.