საქართველოს ეროვნული ატლასი და იოანე პეტრიწის თარგმანები ფრანკფურტის ფესტივალზე

საქართველოს ეროვნული ატლასი და იოანე პეტრიწის თარგმანები ფრანკფურტის ფესტივალზე

ქართულ-გერმანული სამეცნიერო ურთიერთობები იყო DAAD-ის ვიცე-პრეზიდენტის, გისენის უნივერსიტეტის პრეზიდენტის, ჯობრატო  მუქერჯის საჯარო ლექციის მთავარი თემა ფრანკფურტის წიგნის ფესტივალზე, რომლის ფარგლებშიც გერმანიაში გამოცემული საქართველოს პირველი ეროვნული ატლასი საერთაშორისო საზოგადოებას   წარუდგინა. მისი განცხადებით, საქართველო-გერმანიის სამეცნიერო თანამშრომლობა ათწლეულებს ითვლის. „თსუ-ს დამფუძნებლებს მჭიდრო კავშირი ჰქონდათ გერმანულ სამეცნიერო - საგანმანათლებლო  სივრცესთან და ეს ტრადიცია დღემდე გრძელდება. ამის კარგი მაგალითია გერმანულ-ქართული სამეცნიერო ხიდი, რომელიც იულიხის ცენტრისა და თსუ-ს ორგანიზებით ყოველწლიურად იმართება“,- განაცხადა მუქერჯიმ.  მან ხაზი გაუსვა გერმანულ-ქართულ საზაფხულო სკოლას, რომელიც ახალგაზრდებისთვის საუკეთესო საშუალებას წარმოადგენს  საერთაშორისო კონტაქტების დამყარებისთვის.

„საქართველოს როგორც  ფრანკფურტის წიგნის ფესტივალის პარტნიორს, შესანიშნავი შესაძლებლობა აქვს აჩვენოს, რომ საქართველოსა და გერმანიას შორის სამეცნიერო თანამშრომლობა მაღალ დონეზეა აყვანილი და მეტიც ეს კავშირები უნივერსიტეტებს შორი  უფრო მეტად ვითარდება.“- განაცხადა ჯობარტო მუქერჯიმ. მისი თქმით, საქართველო გერმანიისთვის მნიშვნელოვანი პარტნიორია და გერმანულ-ქართული თანამშრომლობის კარგი ნიმუშია „საქართველოს ეროვნული ატლასი“. გისენის უნივერსიტეტის პრეზიდენტი ამავდროულად თსუ-ს საპატიო დოქტორია.

პირველ ეროვნულ ატლასში, სადაც საქართველო საერთაშორისოდ აღიარებულ საზღვრებშია წარმოდგენილი, 100-ზე მეტი რუკა,  გრაფიკები და ფოტოებია წარმოდგენილი. გამოცემა წარმოადგენს 2012 წელს გამოცემული ქართულენოვანი ატლასის გადამუშავებულ და განახლებულ ვერსიას. მასში მთლიანადაა განახლებული საზოგადოებრივი გეოგრაფიის თემატური რუკები, რომელთა შედგენაშიც  ახალი აღწერის მასალებია გამოყენებული. გამოცემა მომზადდა თბილისის სახელმწიფო უნივერსიტეტის ვახუშტი ბაგრატიონის სახელობის გეოგრაფიის ინსტიტუტისა და გერმანიის იუსტუს ლიბიხის სახელობის გისენის უნივერსიტეტის გეოგრაფიის დეპარტამენტის მიერ. საქართველოს ეროვნული ატლასი გერმანული მხარის თანადაფინანსებით გამოიცა.

ფესტივალზე  ძველი ქართული ფილოსოფიური კულტურის შესახებ ისაუბრა თბილისის სახელმწიფო უნივერსიტეტის პროფესორმა ლევან გიგინეიშვილმა. მან ფართო საზოგადოებას წიგნი  „იოანე პეტრიწის პლატონური თეოლოგია“ წარუდგინა. „მნიშვნელოვანი იყო ძველი ქართული ფილოსოფიური კულტურის წარმოჩენა. ჩვენ მეთორმეტე საუკუნეში გვქონდა ასეთი მაღალხარისხოვანი თარგმანი პროკლესი, რომელიც ლათინებმა მარტო საუკუნე ნახევრის მერე გააკეთეს, და არა მარტო თარგმანი, არამედ იოანე პეტრიწის მიერ მთელი ურთულესი მეტაფიზიკური ნააზრევის კრეატიული გადამუშავება ქრისტიანულ კონტექსტში.“-აღნიშნა ლევან გიგინეიშვილმა.

თბილისის სახელმწიფო უნივერსიტეტის რექტორის გიორგი შარვაშიძის თქმით, ფესტივალის პირველივე დღეს ძალიან დიდი იყო ინტერესი საქართველოს სტენდზე, ასევე დიდი იყო დაინტერესება ქართულ, მათ შორის თსუ-ს გამოცემებზე.  

ფრანკფურტის წიგნის ფესტივალზე თსუ-მ 50-ზე მეტ სამეცნიერო წიგნი, თარგმანი და სხვადასხვა მიმართულების სამეცნიერო პერიოდული ჟურნალი წარადგინა.