დღეს ფონდი ნატახტარის ხელშეწყობით დანიელ შერვაშიძე წარმატებულია. ივნისში „ვეფხისტყაოსნის“ საჯარო კითხვის დღისადმი მიძღვნილ ღონისძიებაში აქტიური მონაწილეობისთვის ქალაქ ზუგდიდის მუნიციპალიტეტის მერმა ირაკლი გოგოხიამ სპეციალური სიგელი გადასცა. დანიელმა ასევე თავი გამოიჩინა კონკურსში „ვხატავთ ბიბლიურ პერსონაჟებს“. ზუგდიდისა და ცაიშის ეპარქიის ახალგაზრდობის სულიერი და ინტელექტუალური განვითარების ცენტრმა ის სიგელით დააჯილდოვა.

მნიშნელოვანია, რომ პროექტში „იზრუნე მომვალზე“ დანიელი 16 წლის ჩაერთო. მას  ნოემბერში უკვე 18 წელი უსრულდება და  დამოუკიდებელ ცხოვრებას შეუდგება. როგორც მისი ფსიქოლოგი ლელა ზარქუა  აღნიშნავს, დანიელი  აქტიურად ემზადება დამოუკიდებელი ცხოვრებისთვის -  იღებს პროფესიულ განათლებას,  და ასევე წარმატებულია საყვარელ საქმიანობაში - ფერწერაში: „დანიელი 16 წლის იყო როცა ჩვენი შეხვედრა შედგა, ეს იყო მორცხვი მოზარდი, რომელსაც  ნაკლებად სჯეროდა საკუთარი ნიჭის და  წარმატებების.   არ ქონდა გააზრებული მომავლის პერსპექტივები და  არ უთმობდა დროს  შემოქმედებითი  უნარების განვითარებას.  დანიელთან  ფსიქოლოგიური მუშაობა სწორედ ამ მიმართულებით  წარიმართა. დანიელი დღეს სამხატვრო სკოლის  წარმატებული მოსწავლეა. ის აქტიურად  იღებს მონაწილეობას  კონკურსებსა და გამოფენებში. ამის დასტურია   კონკურსებში  მიღებული  დიპლომები და მიღწეული შემოქმედებითი წარმატებები. დანიელი ჩვენი პროექტიდან იღებს სტიპენდიას და ასევე  გრძელდება ფსიქოლოგიური მხარდაჭერა”.

მნიშნელოვანია, რომ „ფონდი ნატახტარი“ კვლავ აგრძელებს თანხების შეგროვებას და მცირე საოჯახო ტიპის სახლებში მცხოვრები მოზარდების მხარდაჭერის პროგრამას. აქცია დაიწყო 16 მაისს და გრძელდება 17 აგვისტომდე. ფონდის ხელშეწყობით, დღეს მზრუნველობამოკლებული მოზარდები წარმატებულები და დამოუკიდებლები არიან.  „ფონდი ნატახტარი“ ჩემნაირი ბავშვების იმედია. მინდა ბევრმა გაიგოს რა კეთდება და ბევრმა დაგვიჭიროს მხარი, თუნდაც ლიმონათის შეძენით, რომ ბვერმა ბავშვმა მიიღოს ფონდისგან დახმარება,“ - აზრს გვიზიარებს დანიელი. 

2011 წლიდან, „ფონდი ნატახტარი“ მზრუნველობამოკლებულ მოზარდებს დამოუკიდებელი ცხოვრებისთვის მომზადებაში ეხმარება. 5 წლის განმავლობაში, ფონდში 600 000  ლარზე მეტი შეგროვდა. პროექტის ,,იზრუნე მომავალზე’‘ ფარგლებში,  მოზარდებს  საგნებშიც ამზადებენ, სპეციალისტები პროფესიული განათლებისა და მართვის მოწმობის მიღებაში, ასევე პროფესიისთვის საჭირო იარაღების/მასალის შეძენაშიც ეხმარებიან. ,,ფონდი ნატახტარი” კი მათ სტიპენდიით, ბინის ქირით, კვებისა და გზის ხარჯებითაც უზრუნველყოფს. რაც მთავარია, ფონდი თითოეული ბენეფიციარისთვის თანხას მათი საჭიროებებიდან გამომდინარე, ინდივიდუალურად გამოყოფს.