ფინანსთა მინისტრის მოადგილის ლაშა ხუციშვილის განცხადებით, საქართველოში მნიშვნელოვანი საგადასახო რეფორმა მიმდინარეობს, რომელიც ორ ძირითად მიმართულებას მოიცავს.

მინისტრის მოადგილის თქმით, საგადასახადი რეფორმა როგორც საგადასახადო პოლიტიკის მიმართულებას, ასევე ადმინისტრირების მიმართულებასაც მოიცავს.

"საქართველოში ხორციელდება მნიშვნელოვანი საგადასახადო რეფორმა, რომელიც მოიცავს როგორც საგადასახადო პოლიტიკის მიმართულებას, ასევე საგადასახადო ადმინისტრირების მიმართულებას. პირველ რიგში, უნდა აღნიშნოთ მოგების გადასახადის რეფორმა, კერძოდ, ეს ნიშნავს იმას, რომ კომპანიები, რომლებიც დივიდენტად გაანაწილებენ მოგებას, მხოლოდ ამ შემთხვევაში დაიბეგრებიან მოგების გადასახადით და ყველა სხვა შემთხვევაში, განთავისუფლდებიან მოგების გადასახადიდან. მათ შორის, რეინვესტირების შემთხვევაში. აღნიშნული რეფორმის შედეგად, ველოდებით, რომ უნდა გაიზარდოს და დაჩქარდეს ეკონომიკური ზრდის ტემპი. ამასთან, დადებითად იმოქმედებს რეფორმა ბიზნესზე, განსაკუთრებით მცირე და საშუალო ბიზნესზე ფინანსებზე ხელმისაწვდომობის კუთხით. მნიშვნელოვანია ასევე, რომ გაუმჯობესდება საინვესტიციო გარემო და იმ პირდაპირი უცხოური ინვესტიციების ზრდაც მოყვება რეფორმას. ყველა ეს კომპონენტი ხელს შეუწყობს დასაქმების ზრდას ქვეყანაში", - განაცხადა ფინანსთა მინისტრის მოადგილემ საზოგადოებრივ არხზე გადაცემა „მოამბეში“ პირდაპირი ჩართვისას.

რაც შეეხება საწარმოებისთვის დავალიანების ჩამოწერას, მინისტრის მოადგილის თქმით, ის იმ კომპანიებს შეეხება, რომლებსაც დავალიანება 2011 წლამდე უფიქსირდებათ და მას შემდეგ აქტივობები არ ჰქონიათ.

"საგადასახადო დავის პერიოდში, საგადასახადო ორგანოს საბანკო ყადაღის დადება შეეძლება მხოლოდ სასამართლოს გადაწყვეტილებით. გარდა ამისა, საგადასახადო შემოწმებას განახორციელებს მხოლოდ საგადასახდო ორგანო. გარდა ამისა, კიდევ ერთი მნიშვნელოვანი სიახლეა ის, რომ კომპანიებს, რომლებსაც აქტივობა არ უფიქსირდებათ 2011 წლის შემდეგ და აქვთ დავალიანება, ჩამოეწერებათ ძირითადი თანხის ნაწილში, ხოლო ჯარიმა და საურავის ნაწილში 2013 წლამდე წარმოქმნილი დავალიანებების. ეს შეეხება 100 ათასამდე ფიზიკურ და იურიდიულ პირს, ჯამში 2 მილიარდ ლარამდე დავალიანებას", - აღნიშნა ხუციშვილმა.

მისი თქმით, მოგების გადასახადის რეფორმა ასევე ითვალისწინებს ორი წლის განმავლობაში საგადასახადო შემოსავლების შემცირებას ითვალისწინებს, თუმცა გრძელვადიან პირობებში ეს თანხები სრულად ანაზღაურდება.