22 დეკემბერს,   18:30 საათზე ეროვნული ბიბლიოთეკის  დარბაზში ძუძუს კიბოს დამიზნებითი თერაპიის ხელმისაწვდომობის მხარდამჭერი საინფორმაციო კამპანიის „სამიზნე სიცოცხლისთვის“ ფარგლებში გაიმართება კლასიკური მუსიკის საქველმოქმდო  საღამო „მუსიკალური თერაპია“.  ღონისძიების ორგანიზატორია კოალიცია „ევროპა დონა საქართველო“   და მარიამ ნაჭყებია. 

შესრულდება ყველასთვის ცნობილი და საყვარელი  ნაწარმოებები და საოპერო არიები .

მონაწილეობენ მარიამ ნაჭყებია ,ოთარ ჯორჯიკია , ზურაბ რობაქიძე , ივონე მამფრედა , ქეთევან  სიხარულიძე , ოთო შიშინაშვილი ,ნათია მელქაძე , ტატო ალანია , ხათუნა ლოლაძე , ეკა გოგოლიძე , მაია ფერაძე , კირა ლელაშივილი , მარინა მეტრეველი .

ღონისძიების მიზანია საზოგადოების ინფორმირება ძუძუს კიბოს დამიზნებითი თერაპიის ეფექტურობისა და მისი ხელმისაწვდომობის გაზრდის მხარდამჭერი კამპანიის შესახებ.

ღონისძიებას დაესწრებიან  „ევროპა დონა საქართველოს“ წარმომადგენლები, ექიმი-ონკოლოგები, დარგის სპეციალისტები, პაციენტები, სამთავრობო და არასამთავრობო ორგანიზაციების წარმომადგენლები და სხვა.

ძუძუს კიბო  ქალებში სიმსივნეებს შორის გავრცელების მიხედვით პირველ ადგილზეა მსოფლიოში. ყოველწლიურად 1 000 000 ახალი შემთხვევა დიაგნოსტირდება და 900 000 ქალი იღუპება ამ დაავადებით. რვიდან ერთი ქალი ავადდება ძუძუს კიბოთი მისი სიცოცხლის განმავლობაში. ქალებში კიბოთი გამოწვეული სიკვდილობის თვალსაზრისით ძუძუს კიბო პირველ ადგილზეა მსოფლიოში. არსებობს ძუძუს კიბოს სხვადასხვა ტიპი. ქალებმა არ უნდა დაკარგონ ძვირფასი დრო და სიცოცხლე იმის გამო, რომ სრულფასოვნად ვერ იტარებენ საჭირო მკურნალობას ფინანსების არარსებობის გამო. საქართველოში ყოველწლიურად, ძუძუს კიბოს 1500-ზე მეტი  ახალი შემთხვევა ფიქსირდება და ამ სენისგან წელიწადში 800-ზე მეტი ქალი იღუპება. ეს არის 800 ოჯახის ტრაგედია და სამწუხაროდ ეს რიცხვი ყოველწლიურად იმატებს.

უკანასკნელი 50 წლის განმავლობაში ახალმა აღმოჩენებმა და ინოვაციებმა გააღრმავა ცოდნა კიბოს შესახებ.  მნიშვნელოვანი პროგრესი იქნა მიღწეული დიაგნოსტიკის, სკრინინგის, ქირურგიის, რადიოთერაპიის, ქიმიოთერაპიის, კომბინაციური და დამიზნებითი ანუ თარგეთული  თერაპიის თვალსაზრისით.

დამიზნებითი თერაპიის დროს პრეპარატი უშუალოდ მიმართულია და აინჰიბირებს სიმსივნურ უჯრედში მიმდინარე პროცესს, რომელიც წამყვანი ფაქტორია ცალკეული სიმსივნეების განვითარებასა და ზრდაში. აქედან წარმოიშვა მისი სახელწოდებაც - „დამიზნებითი თერაპია“.

რადგან დამიზნებითი თერაპია სპეციფიურად მიმართულია კიბოს უჯრედებზე, ის ძალზე ეფექტურია,  ნაკლებ ზიანს  აყენებს  ნორმალურ უჯრედებს და გააჩნია ნაკლები გვერდითი მოვლენები სტანდარტულ ქიმიოთერაპიასთან შედარებით. საქართველოში დამიზნებითი თერაპია არ არის ხელმისაწვდომი პაციენტთა  უმრავლესობისთვის.

ძუსუს კიბოს დამიზნებითი თერაპიის ხელმისაწვდომობის საინფორმაციო კამპანია 4 თებერვალს, კიბოს წინააღმდეგ ბრძოლის საერთაშორისო დღეს დაიწყო. ამავე დღეს შემუშვდა კამპანიის მხარდამჭერი პეტიცია და დაიწყო ხელმოწერების შეგროვება.  კამპანიის მიზანია გაზარდოს  საზოგადოების და სამთავრობო სტრუქტურების ინფორმირება ძუძუს კიბოს დამიზნებითი თერაპიის ეფექტურობისა და მისი ხელმისაწვდომობის გაზრდის აუცილებლობის შესახებ.