სახელმწიფო სამხედრო სამეცნიერო-ტექნიკურ ცენტრ „დელტას“ გენერალური დირექტორის თქმით, ბოლო პერიოდში სეტყვასაშიში ღრუბლების საერთო ფართობი 6 500 კმ2 იყო, რაც კახეთის რეგიონის ტერიტორიას ორჯერ აღემატება.

უჩა ძოძუაშვილის ინფორმაციით კახეთში განთავსებული სეტყვასაწინააღმდეგო დანადგარები სრულ მზადყოფნაშია მოყვანილი. როგორც „დელტას“ გენერალურმა დირექტორმა "მაესტროს ცხრიანში" განაცხადა სეტყვასაწინააღმდეგო სისტემის მიერ კახეთში დაშლილი ღრულების სხვა რეგიონებში გადაინაცვლების საფრთხე არ არსებობს.

"გასული დღეების განმავლობაში სეტყვის საწინააღმდეგო სისტემის მუშაობის შედეგად, კახეთში მოსალოდნელი სტიქია და შესაბამისად ზარალი შესაძლებლობების ფარგლებში მაქსიმალურად შემცირდა. ბოლო პერიოდში სეტყვასაშიში ღრუბლების საერთო ფართობი 6 500 კმ2 იყო, რაც მთლიანად, კახეთის რეგიონის ტერიტორიას ორჯერ აღემატება. კახეთში განთავსებული სეტყვასაწინააღმდეგო დანადგარები ამ ეტაპზე სრულ მზადყოფნაშია მოყვანილი. გავრცელებული ხმები კი თითქოსდა სეტყვასაწინააღმდეგო სისტემის მიერ კახეთში დაშლილი ღრულები სხვა რეგიონებში გადაინაცვლებს, ძირეულად მცდარია. სისტემის ზემოქმედების შედეგად ღრუბლებში არსებული ნალექი ადგილზევე ჩამოიცლება წვიმად და მისი სხვა რეგიონში გადანაცვლების საფრთხე თეორიულადაც არ არსებობს“,- განაცხადა უჩა ძოძუაშვილმა "მაესტროს ცხრიანში".

მისივე თქმით, სეტყვის საწინააღმდეგო სისტემის მართვის ცენტრი შესაბამის სამსახურებთან მჭიდრო თანამშრომლობით 24 საათიან რეჟიმში აგრძელებს მუშაობას.