დღეს საღამოს, ვაჟა-ფშაველას გამზირზე მდებარე ე.წ. მოდულის შენობასთან ახლოს, თავხელიძის ქ. N 1-თან, მშენებარე კორპუსის გათხრილი საძირკვლის ტერიტორიაზე ისევ ჩამოიშალა მიწის მასივი. საძირკვლის ჩამოშლას კვლავ მოჰყვა იქვე გამავალი საკანალიზაციო მილის დაზიანება.
„მოდულის" შენობის მიმდებარედ მიწის ჩაწოლის ეს უკვე მესამე შემთხვევაა. აღნიშნულის მიზეზი, ამჯერადაც, სამშენებლო კომპანია შპს "ბანის" მიერ მშენებარე კორპუსის საძირკვლისთვის გათხრილი ქვაბულის არასათანადო გამაგრებაა.
„მოდულის" შენობის მიმდებარედ, შემთხვევის ადგილზე, დაზიანებული საკანალიზაციო მილის აღსადგენად მობილიზებულია „ჯორჯიან უოთერ ენდ ფაუერის" სპეციალისტები და საავარიო ბრგადები. სამუშაოების ჩატარების მიზნით, დღეს საღამოს, 20:30 საათიდან, ვაჟა ფშაველას გამზირზე მდებარე კორპუსებს - N78ბ, 76ბ-ს და "საქართველოს გაერთიანებული წყალმომარაგების კომპანიის" ოფისს წყალმომარაგება შეუწყდება.
„მოდულის" შენობის მიმდებარედ, მშენებარე კორპუსის გათხრილი საძირკვლის ტერიტორიაზე მიწის ჩამოშლის პირველი შემთხვევა 1 თებერვალს, ხოლო განმეორებითი - 2 თებერვალს მოხდა. ორივე ჯერზე, ავარიულად დაზიანებული საკანალიზაციო მილის „ჯორჯიან უოთერ ენდ ფაუერმა" საკუთარი ძალებით აღადგინა.
კომპანიის ხელთარსებული ინფორმაციით, სამშენებლო კომპანია შპს "ბანს" მშენებლობის საწარმოებლად 2007 წელს აღებული ძველი ტექნიკური პირობა არ ჰქონდა განახლებული, ამასთან, შპს "ბანს" არც საძირკვლისთვის გათხრილი ქვაბული აქვს ტექნიკური ნორმების დაცვით გამაგრებული, რაც მიწის ჩამოწოლასა და საკანალიზაციო ქსელის დაზიანებას იწვევს.
„ჯორჯიან უოთერ ენდ ფაუერი" შეეცდება მაქსიმალურად სრაფად დაასრულოს სამუშაოები და საცხოვრებელ 2 კორპუსს წყალმომარაგება აღუდგინოს.
