იმედს გამოვთქვამთ, რომ ევროკავშირში ვისიამოვნებთ სულგუნითა და მაწვნით, - ამის შესახებ ევროკავშირის ელჩმა საქართველოში იანოშ ჰერმანმა „ტვიტერის“ საკუთარ გვერდზე დაწერა.
ამ პოსტით ჰერმანი გამოეხმაურა დღეს, სასტუმრო „რედისონ ბლუ ივერიაში" გამართულ კავკასიის რძის სექტორის კონგრესს, რომელიც საქართველოს გარემოს დაცვისა და სოფლის მეურნეობის მინისტრმა ლევან დავითაშვილმა და ევროკავშირის ელჩმა საქართველოში იანოშ ჰერმანმა გახსნეს.
„დღეს გამართულ კავკასიის რძის სექტორის კონგრესზე ხაზი გავუსვით ევროკავშირთან თავისუფალი ვაჭრობის შესაძლებლობებს ექსპორტიორებისთვის, ასევე, საქართველოს მოქალაქეების სარგებელს, რომელსაც მიიღებენ უკეთესი ხარისხისა და უფრო ჯანმრთელი რძის პროდუქტებით. იმედს გამოვთქვამთ, რომ ევროკავშირში ვისიამოვნებთ სულგუნითა და მაწვნით“, - წერს ჰერმანი „ტვიტერის“ საკუთარ გვერდზე.
კავკასიის რძის სექტორის კონგრესის მთავარი თემა დღეს მცირე და საშუალო ბიზნესის ურთიერთთანამშრომლობის და ახალი შესაძლებლობების განხილვა იყო. როგორც „ინტერპრესნიუსს“ გაერო-ს სურსათისა და სოფლის მეურნეობის ორგანიზაციიდან აცნობეს, რძის პროდუქტების წარმოების ხელშეწყობის მიზნით, კონგრესს ყოველწლიურად ევროპის რეკონსტრუქციისა და განვითარების ბანკი (EBRD) და გაერო-ს სურსათისა და სოფლის მეურნეობის ორგანიზაცია (FAO) მასპინძლობენ. ღონისძიების მხარდამჭერები არიან ევროკავშირი - ინიციატივით "ევროკავშირი ბიზნესისათვის" და საქართველოს გარემოს დაცვისა და სოფლის მეურნეობის სამინისტრო.
კონგრესს კავკასიიდან და აღმოსავლეთ ევროპიდან 200-ზე მეტი მონაწილე დაესწრო. მათ შორის იყვნენ ფერმერები, გადამამუშავებლები, დანადგარ-მოწყობილობების მიმწოდებლები, დარგის ექსპერტები და საქართველოს მთავრობის წარმომადგენლები.
