უკრაინის უსაფრთხოების სამსახური ქვეყნის მასშტაბით ოპერაციას ატარებს იმ პირებთან მიმართებაში, რომლებიც რუსეთს უწყობენ ხელს ანტიუკრაინული აქციების ჩატარებაში.
როგორც უწყების პრესმდივანმა ელენა გიტლიანსკაიამ განაცხადა, სპეცსამსახურის თანამშრომლები 25-ზე მეტ ადგილას ატარებენ ჩხრეკას.
არსებული ინფორმაციით, ჩხრეკები ასევე ტარდება რიგ ჟურნალისტებთან მიმართებაში.
„სამწუხაროდ, ამ მოქალაქეებს შორის ჟურნალისტებიც არიან, თუმცა ამა თუ იმ პროფესიისადმი კუთვნილება არ შეიძლება ინდულგენციის მიზეზი გახდეს“, - განაცხადა უკრაინის უსაფრთხოების სამსახურის პრესმდივანმა.
მისი თქმით, ოპერაციის ფარგლებში ამოღებულია პროპაგანდისტული მასალები, იარაღი, ასაფეთქებელი ნივთიერებები.
უწყებაში აღნიშნეს, რომ მოგვიანებით დეტალურ ინფორმაციას გაავრცელებენ დღევანდელ სპეცოპერაციასთან დაკავშირებით.
