პრეზიდენტს დღეს საბოლოო გადაწყვეტილება არ გაუხმოვანებია, თუმცა ყველანი ვთანხმდებით, რომ ვენეციის კომისიასთან შეთანხმებულ ორ საკითხზე კონსენსუსია და სადავო საკითხები არ არსებობს, - ამის შესახებ ფრაქცია "ქართული ოცნება - დემოკრატიული საქართველოს" თავმჯდომარე მამუკა მდინარაძემ საქართველოს პრეზიდენტთან შეხვედრის დასრულების შემდეგ განაცხადა.
"ახლა ჯერი პრეზიდენტზეა. საკითხი დგას ასე - გადაწყვეტს თუ არა, რომ ეს ორი საკითხი ასახოს თავის შენიშვნებში. იმ შემთხვევაში, თუ ეს კონსენსუსი არ იქნა გათვალისწინებული, ჩვენ ბუნებრივია, ვიფიქრებთ ვეტოს დაძლევაზე", - განაცხადა მამუკა მდინარაძემ.
მისივე ინფორმაციით, პრეზიდენტმა განაცხადა, რომ რამდენიმე დღეში გაახმოვანებს საბოლოო გადაწყვეტილებას; ასევე, არ უთქვამს, რომ ეს დაკავშირებულია ვენეციის კომისიის საბოლოო დასკვნასთან.