საპარლამენტო უმცირესობის დეპუტატი გიგა ბოკერია მთავრობას მიმართავს, პენსიის ოდენობის გაზრდის და საგადასახადო ტვირთის შემცირების მიზნით ბიუროკრატიული ხარჯების შემცირების გადაწყვეტილება მიიღოს.
უმცირესობის სხდომაზე, სადაც 2017 წლის სახელმწიფო ბიუჯეტის 6 თვის შესრულების ანგარიშის განხილვა მიმდინარეობს, ბოკერიამ ფინანსთა მინისტრის მოადგილეს გიორგი კაკაურიძეს მიმართა კითხვით, ქვეყანას ძალიან რომ გაუჭირდეს, არის თუ არა მზად იმისთვის, 20%-ით ნაკლები შემოსავლით იმუშაოს და არის თუ არა მზად ამისთვის მთელი სახელმწიფო მანქანა.
”ქვეყანას უკვე ძალიან უჭირს და რატომ არ იხილავთ ამ ვარიანტს, მილიარდ შვიდას მილიონზე მეტია სახელფასო ხარჯი. ამის 20%-ით შემცირება ნიშნავს, პენსიის 50 ლარით გაზრდას და გადასახადების დაწევას ყველა იმ მოქალაქისთვის, ვინც ქმნის დოვლათს და სამუშაო ადგილებს. რატომ არ იხილავთ ბიუროკრატიული ხარჯების შემცირების საკითხს?!” - მიმართა ბოკერიამ გიორგი კაკაურიძეს.
ამასთან, უმცირესობის წევრებმა პროტესტი გამოთქვეს იმასთან დაკავშირებით, რომ ბიუჯეტის შესრულების ანგარიშის წარსადგენად პარლამენტში ფინანსთა მინისტრი არ მივიდა. მათ მინისტრი პარლამენტისადმი უპატივცემულობაში დაადანაშაულეს.
