13 სექტემბერს, ევროპარლამენტში, ევრონესტის საპარლამენტო ასამბლეის ბიუროს სხდომა გაიმართა, რომელშიც საქართველოს პარლამენტის დელეგაციის ხელმძღვანელი ევრონესტის საპარლამენტო ასამბლეაში, თამარ ხულორდავა მონაწილეობდა.
აღმოსავლეთ ევროპის პარლამენტების წარმომადგენელებმა ევროპარლამენტის წევრებთან ერთად ევრონესტის საპარლამენტო ასამბლეის პლენარული სხდომის მოსამზადებელი სამუშაოები განიხილეს.
განისაზღვრა პლენარული სხდომის დღის წესრიგი, რომელსაც 31 ოქტომბრიდან უკრაინის უმაღლესი რადა უმასპინძლებს, განხილულ იქნა საერთო ინტერესების საკითხები და სამომავლო სამოქმედო გეგმა.
ევროკავშირთან საქართველოს, მოლდოვას და უკრაინის პარტნიორობის გაძლიერების მიზნით, ევრონესტის საპარალამენტო ასამბლეაში შეიქმნა სამუშაო ჯგუფი ევროკავშირის ასოცირებული პარტნიორებისთვის.
ჯგუფი, რომელშიც საქათველოს თამარ ხულორდავა და სერგი კაპანაძე წარმოადგენენ, რეგულარულად შეიკრიბება და განიხილავს სამი ქვეყნის ასოცირების შეთანხმების განხორციელების პროცესს, მიღწევებს და გამოწვევებს.
მიმდინარე წელს, ევრონესტის საპარლამენტო ასამბლეის ყურადღების საგანია ახალგაზრდობის უმუშევრობის შემცირება, რეგიონში ენერგოუსაფრთხოების გაუმჯობესება, ქალთა გაძლიერება და მედიის თავისუფლება.
ევრონესტის საპარლამენტო ასამბლეას, როგორც აღმოსავლეთ პარტნიორობის პოლიტიკის საპარლამენტო განზომილებას, მნიშვნელოვანი წვლილი შეაქვს აღმოსავლეთ პარტნიორობის პოლიტიკის წარმატებაში.
