ჩვენი ოპონენტების ნაწილის მიერ ვენეციის კომისიისადმი მიმართვა არ არის სწორი პოლიტიკური სვლა, - ამის შესახებ ფრაქცია ,,ქართული ოცნების" თავმჯდომარემ, მამუკა მდინარაძემ საკონსტიტუციო ცვლილებებთან დაკავშირებით ოპოზიციური პარტიების მიერ ვენეციის კომისიის და ევროპული სტრუქტურებისადმი გაგზავნილი ერთობლივი მიმართვის საპასუხოდ განაცხადა.
როგორც მამუკა მდინარაძემ აღნიშნა, მიმდინარეობს კონსულტაციები საკონსტიტუციო ცვლილებებთან დაკავშირებული შესაძლო შეთანხმების თაობაზე.
„ჩვენ უახლოეს მომავალში ველოდებით შეხვედრას როგორც საპარლამენტო, ასევე არასაპარლამენტო ოპოზიციის წარმომადგენლებთან. ამასთან, გამოვთქვამთ მზადყოფნას ნებისმიერი რაციონალური წინადადების განხილვასთან დაკავშირებით. ამ ფონზე ჩვენი ოპონენტების ნაწილის მიერ ვენეციის კომისიისადმი მიმართვა არ არის სწორი პოლიტიკური სვლა და ნამდვილად არ წარმოადგენს კონსტრუქციულ ნაბიჯს კონსტიტუციურ ცვლილებებთან დაკავშირებულ კონსენსუსთან მიმართებით", - განაცხადა მდინარაძემ.
ოპოზიციური პარტიები საკონსტიტუციო ცვლილებების საკითხზე ვენეციის კომისიას და ევროპულ სტრუქტურებს ერთობლივ მიმართვას უგზავნიან. მიმართვაში ოპოზიციური პარტიები აღნიშნავენ, რომ საკონსტიტუციო რეფორმის პროცესი ჩიხშია შესული და ხელისუფლების მხრიდან წამოყენებული ულტიმატუმის გამო მოლაპარაკებების დაწყება ვერ ხდება. მიმართვის ავტორები ვენეციის კომისიას და ევროპულ სტრუქტურებს თხოვნით მიმართავენ, ხელისუფლების წინაშე კიდევ ერთხელ დააყენონ საკითხი, ჩვენი ქვეყნის უმთავრესი კანონის მიღებისას, უმნიშვნელოვანეს საკითხებზე, კონსენსუსის აუცილებლობის შესახებ.
