პრეზიდენტის შეფასება თუ მოწოდება უმრავლესობისადმი, არის არაობიექტური და უსამართლო, - ამის შესახებ საქართველოს პრემიერ-მინისტრმა გიორგი კვირიკაშვილმა "ინტერპრესნიუსს" აშშ–ის დამოუკიდებლობის დღისადმი მიძღვნილი საზეიმო მიღების შემდეგ განუცხადა.
მისი თქმით, აშშ–ის დამოუკიდებლობის დღისადმი მიძღვნილი საზეიმო მიღება შიდა პოლიტიკურ საკითხებზე კამათისა და დისკუსიისთვის შესაფერისი ადგილი არ არის.
"საზოგადოება, ჩვენი ქვეყნის მოსახლეობა კარგად ხედავს, რომ ჩვენი პოლიტიკური გუნდი, რომელმაც ჯერ კიდევ არჩევნების დროს აიღო პასუხისმგებლობა პირველ რიგში საკუთარი ხალხის და ამომრჩევლის წინაშე, სწორედ ამ პასუხისმგებლობით მიუდგა საკონსტიტუციო ცვლილებების პროცესს. პირველად მოხდა, რომ ჩვენი საზოგადოების ჩართულობით შემუშავდა ქვეყნის მთავარ კანონში შესატანი ცვლილებები.
მიუხედავად ამ პროცესში საზოგადოების უპრეცედენტოდ მაღალი ჩართულობისა, და იმისა, რომ პარლამენტმა უკვე ორი მოსმენით მიიღო ცვლილებები, ჩვენი პოლიტიკური გუნდი უფრო ფართო კონსენსუსის მიღწევის მიზნით, გამოთქვამს სრულ მზაობას დიალოგის გასაგრძელებლად.
თუმცა ყველამ უნდა გაითვალისწინოს, რომ კონსენსუსის მიღწევა მხოლოდ პროცესის ყველა მონაწილის რეალურ მზაობაზე გადის",- განაცხადა გიორგი კვირიკაშვილმა.
აშშ–ის დამოუკიდებლობის დღისადმი მიძღვნილ საზეიმო მიღებაზე გამოსვლისას პრეზიდენტმა საკონსტიტუციო ცვლილებებთან დაკავშირებით, საპარლამენტო უმრავლესობას მოუწოდა, არ იძალადოს პოლიტიკურ პროცესზე და აწარმოოს დიალოგი საზოგადოებასთან. პრეზიდებტს სიტყვით გამოსვლისას უპასუხა პრემიერმა.
"თქვენი ნებართვით, მე არ წავალ დღევანდელი პოლიტიკური კონტექსტის განხილვის სიღრმეში. ვფიქრობ, ეს პროცესი არის ძალიან მნიშვნელოვანი და ხელისუფლებამ ძალიან მნიშვნელოვანი ნაბიჯები გადადგა საქართველოს დემოკრატიული წინსვლისთვის",- აღნიშნა პრემიერ-მინისტრმა.
