საქართველოს პარლამენტის აპარატის უფროსმა, ნიკოლოზ ნათენაძემ საქართველოში ვიზიტად მყოფ მოლდოვას რესპუბლიკის პარლამენტის აპარატის თანამშრომლებთან გაცნობითი ხასიათის შეხვედრა გამართა.
სტუმრები საქართველოს პარლამენტში მიმდინარე პროცესებით დაინტერესდნენ და საკანონმდებლო ორგანოში დაგეგმილ რეორგანიზაციის დეტალებს და რეფორმებს გაეცნენ. საუბარი შეეხო საკადრო საკითხთა დეპარტამენტის განვითარებას, მის რეორგანიზაციასა და სტრუქტურას.
ნიკოლოზ ნათენაძემ მოლდოვას რესპუბლიკის პარლამენტის თანამშრომლებს „საჯარო სამსახურის შესახებ" ახალი კანონი გააცნო, რომელიც ძალაში 1 ივლისს შევიდა.
საქართველოს პარლამენტის აპარატის უფროსის განცხადებით, საჯარო სამსახურის შესახებ კანონმდებლობა ადაპტირებული უნდა იყოს ქვეყნის განვითარების არსებულ მდგომარეობასთან.
„მიმდინარე წლის ბოლომდე საბოლოოდ დარეგულირდება საჯარო სამსახურთან დაკავშირებული ყველა საკითხი, რომლის მიზანია ამ სისტემის საბოლოო სრულყოფა და მისი გამართული ფუნქციონირება", - აღნიშნა ნიკოლოზ ნათენაძემ.
სამდღიანი ვიზიტის ფარგლებში, მოლდოვას რესპუბლიკის პარლამენტის აპარატის თანამშრომლები საქართველოს პარლამენტის სტრუქტურული ერთეულების ხელმძღვანელებს შეხვდებიან. ისინი საკუთარ გამოცდილებას გაუზიარებენ მოლდოველ კოლეგებს.
დაგეგმილია შეხვედრები საქართველოს პარლამენტის ეროვნულ ბიბლიოთეკაში და ფრაქციების აპარატების თანამშრომლებთან.
სტუმრები დაათვალიერებენ საქართველოს პარლამენტის თბილისისა და ქუთაისის სასახლეებს.
