აზერბაიჯანის სახელმწიფო სასაზღვრო სამსახურმა და გენერალურმა პროკურატურამ აზერბაიჯანელი ჟურნალისტის აფგან მუხთარლის დაკავებასთან დაკავშირებით განცხადება გაავრცელეს.
„1974 წელს დაბადებული აფგან მუხთარლი სახელმწიფო სასაზღვრო სამსახურის თანამშრომლებმა ბელაქანის რაიონის ტერიტორიაზე 29 მაისს, 22:40 საათზე დააკავეს მას შემდეგ, რაც მან საქართველოს მხრიდან საკონტროლო-გამშვები პუნქტის გვერდით ავლით პირადობის მოწმობის გარეშე აზერბაიჯანის საზღვარი გადაკვეთა. ის არ დაემორჩილა სახელმწიფო სასაზღვრო სამსახურის თანამშრომლების კანონიერ მოთხოვნას და დაკავებისას გაქცევა სცადა“, - ნათქვამია განცხადებაში.
განცხადებაში ასევე აღნიშნულია, რომ აფგან მუხთარლის თან 10 ათასი ევრო ჰქონდა და Bank of Georgia Express-ის საბანკო ბარათი.
მუხთარლის გუშინ ბაქოს სასამართლომ 3-თვიანი წინასწარი პატიმრობა შეუფარდა.
