”ევროპული საქართველოს” წევრმა სერგი კაპანაძემ იმ თეორიებზე ისაუბრა, რომელიც შესაძლებელია ე.წ. ბონუსების სისტემით შეიქმნას. როგორც კაპანაძემ თელავში, საკონსტიტუციო პროექტის საყოველთაო-სახალხო განხილვაზე განაცხადა, ეს თეორიები აჩვენებს, რომ ეს სისტემა არის უსამართლო.
”ეს არის უსამართლო სისტემა. შემოთავაზებული სისტემით, შესაძლებელია მეორე ან მესამე ადგილზე გასულმა პარტიებმა დააგროვონ 50%-ზე მეტი, ან მეორე, მესამე და მეოთხე ადგილზე გასულმა პარტიებმა დააგროვონ 51%-იც კი, თუმცა ვერ დააკომპლექტონ მთავრობა. რაც არ უნდა გვეძახონ, რომ ეს არ არის ხმების მოპარვა, აბა რა არის? მაგალითად: პირველ ადგილზე გასული პარტია იღებს 30%-ს, მეორე ადგილზე გასული პარტია იღებს 29,9%-ს, მესამეზე გასული კი იღებს 20.6%-ს. ჯამში იკარგება 20%-ის ხმები. მათემატიკურად, 29,9% და 20,6% რომ შევკრიბოთ არის 50%-ზე მეტი, მაგრამ ამ სისტემის მიხედვით პირველ ადგილზე გასული პარტია მიიღებს დამატებით 30 მანდატს და 76 ხმით აკომპლექტებს მთავრობას. როგორ არის ეს სამართლიანი სისტემა? ამ სისტემით, შესაძლოა 25%-ზე ნაკლები ჰქონდეს მხარდაჭერა პირველ ადგილზე გასულ პარტიას და ხმების 2/3 მოაგროვოს. ამიტომ, ეს არ არის სამართლიანი სისტემა”, - განაცხადა კაპანაძემ.