ამერიკელი კონგრესმენების მიერ გაკეთებული განცხადება არის საქართველოს მხარდამჭერი, - ამის შესახებ ,,ევროპული საქართველოს“ წევრმა სერგი კაპანაძემ ჟურნალისტებთან საუბრისას განაცხადა. მისი თქმით, განცხადებაში, რომელიც კონგრესმენებმა გაავრცელეს, ყველა საკითხზეა ყურადღება გამახვილებული.
,,ამერიკელი კონგრესმენების განცხადება ეს არის ქვეყნის მხარდაჭერა ამერიკა- საქართველოს დიპლომატიური ურთიერთობის 25 წლისთავის აღსანიშნავად. განცხადებაში ყველა მნიშვნელოვანი საკითხია ნახსენები, მათ შორის ისიც, რაც ჩვენი ხელისუფლების პასიურობის გამო იყო გაჩერებული, მაგალითად, თავისუფალი ვაჭრობის შეთანხმება აშშ-თან. ეს არის ჩვენი მეგობრების მხარდამჭერი წერილი. იმედი გვაქვს, რომ მთავრობა ახლა მაინც გაითვალისწინებს რამდენიმე მნიშვნელოვან საკითხს, მათ შორის თავისუფალი ვაჭრობის კუთხით’’ , - განაცხადა სერგი კაპანაძემ.
აშშ-ის წარმომადგენელთა პალატის 30-მა კონგრესმენმა აშშ-სა და საქართველოს შორის დიპლომატიური ურთიერთობების 25 წლისთავისა და ორ ქვეყანას შორის მტკიცე სტრატეგიული პარტნიორობის აღსანიშნავად,საქართველოს მხარდამჭერი წერილით პრეზიდენტ დონალდ ტრამპს მიმართა. საქართველოს მეგობართა ჯგუფის თანათავმჯდომარეების ტედ პოსა (რესპუბლიკელი-ტეხასის შტატი) და ჯერალდ კონოლის (დემოკრატი-ვირჯინიის შტატი) მიერ ინიცირებული წერილი წარმოადგენს საქართველოსადმი აშშ-ის ორპარტიული ურყევი მხარდაჭერის კიდევ ერთ მკაფიო მაგალითს, რომელსაც ხელს აწერენ როგორც აშშ-ის რესპუბლიკელი, ასევე დემოკრატი კონგრესმენები.
