რაც შეეხება საკონსტიტუციო ცვლილებების პარალელურ ფორმატს, რომელიც პრეზიდენტის ადმინისტრაციამ აირჩია, ჩვენ მის შედეგებს გავეცნობით, - ამის შესახებ პარლამენტის პირველმა ვიცე-სპიკერმა, “ქართული ოცნების” წევრმა თამარ ჩუგოშვილმა განაცხადა.
მისი თქმით, საკონსტიტუციო კომისია გაეცნობა იმ დასკვნებს, რომელსაც პრეზიდენტის ადმინისტრაცია წარადგენს. თუმცა იმისთვის, რომ საქმიანი მსჯელობა შემდგარიყო, საუკეთესო ფორმატი სწორედ საკონსტიტუციო კომისია იყო.
“ზოგადად საგნობრივი განხილვებისთვის, ძალიან მნიშვნელოვანი იქნებოდა, რომ პრეზიდენტის ადმინისტრაციის წარმომადგენლებს მიეღოთ მონაწილეობა საკონსტიტუციო კომისიის მუშაობაში. ეს იქნებოდა სწორი. სამწუხაროდ, ჩვენ არ მოგვცემია შესაძლებლობა, რომ საქმიან ფორმატში შინაარსობრივად და მუხლობრივად განგვეხილა ცვლილებები პრეზიდენტის მონაწილეობით. რაც შეეხება პარალელურ ფორმატს, რომელიც აირჩია პრეზიდენტის ადმინისტრაციამ, ჩვენ გავეცნობით შედეგებს. გავეცნობით თუ რა დასკვნებს წარმოადგენს ადმინისტრაცია, თუმცა იმისთვის, რომ საქმიანად გვესაუბრა, საუკეთესო ფორმატი სწორედ კომისია იყო, რომელიც სამწუხაროდ, არ იქნა გამოყენებული პრეზიდენტის ადმინისტრაციის მიერ”, - განაცხადა თამარ ჩუგოშვილმა.
მისი თქმით, თუკი იქნება შინაარსობრივი წინადადებები, რაც ტექსტის გაუმჯობესებისკენ იქნება მიმართული, საკონსტიტუციო კომისია ამას გაეცნობა, თუმცა მას სულ 73 წევრი ჰყავს და ამ საკითხზე ყველას პოზიცია საინტერესო იქნება.
