მაჟორიტარული სისტემა უნდა გაუქმდეს, - ამის შესახებ არასამთავრობო სექტორის წარმომადგენელმა ვახუშტი მენაბდემ საკონსტიტუციო კომისიის სხდომის დაწყებამდე განაცხადა.
ვახუშტი მენაბდის თქმით, არსებულ პოლიტიკურ სისტემასა და პოლიტიკურ ლანდშაფტში, მაჟორიტარული სისტემის დატოვება ხელს შეუწყობს იმას, რომ ძალაუფლების კონსლიდირება მოხდეს მხოლოდ ერთი პოლიტიკური ჯგუფის ხელში.
”ჩვენ ვართ განწყობილი იმისთვის, რომ კონსოლიდირებული პარლამენტი მივიღოთ. ამისთვის უნდა გადავიდეთ იმ სისტემაზე, რომ 150-ვე დეპუტატი არჩეული იყოს პროპორციული ნიშნით. რაც შეეძლება ბლოკების საკითხს, შეგვიძლია ვისაუბროთ ბლოკების გარკვეულ რეგულირებაზე, შესაძლოა ეს იყოს ბარიერის გაწევა და ა.შ., თუმცა სულ გაუქმებაზე საუბარი არ არის, მაგრამ ყველა ეს მსჯელობა დაკავშირებულია ზოგადად საარჩევნო ბარიერის დაწევაზე. 5%-იანი ბარიერი უნდა დავწიოთ და ამის შემდეგ უნდა ვისაუბროთ სხვა პრობლემებზე, მათ შორის ბლოკებზე”, - განაცხადა ვახუშტი მენაბდემ.
სახელმწიფო საკონსტიტუციო კომისიის სამუშაო ჯგუფი საარჩევნო სისტემის შეცვლის საკითხის განხილვას უბრუნდება. გარდა ამისა, მსჯელობის საგანი იქნება კონსტიტუციის ის ჩანაწერი, რომელიც საარჩევნო ბლოკების შექმნას ეხება.
კომისიის ფარგლებში განიხილება ბლოკების გაუქმების ინიციატივა, რომელიც არსებული ინფორმაციით, საკონსტიტუციო კომისიის თავმჯდომარემ, ირაკლი კობახიძემ დააყენა.
