”ქართული ოცნება” საქართველოს საბჭოთა ოკუპაციის და შევარდნაძის პერიოდებს სამართლიანად მიიჩნევს

”ქართული ოცნება” საქართველოს საბჭოთა ოკუპაციის და შევარდნაძის პერიოდებს სამართლიანად მიიჩნევს

”ქართული ოცნება” საქართველოს საბჭოთა ოკუპაციის და შევარდნაძის პერიოდებს მიიჩნევს სამართლიანად, - ამის შესახებ ”ევროპული საქართველოს” წევრმა, გიორგი კანდელაკმა საგაზაფხულო სესიის პლენარული სხდომაზე განაცხადა, სადაც ფარულ საგამოძიებო მოქმედებებთან დაკავშირებული საკანონმდებლო ინიციატივის განხილვა მიმდინარეობს.

როგორც დეპუტატმა აღნიშნა, უშიშროების დღევანდელ სამსახურს ნდობა ვერ ექნება.

”უმრავლესობის წევრმა სიმონ ნოზაძემ საუკეთესოდ გადმოსცა რაზეა საერთოდ საუბარი - ინაურის დროს, საბჭოთა კავშირის ”კა-გე-ბეს” დროს თურმე უფრო ცივილიზებულად ხდებოდა მოსმენები. მან გაამართლა და ერთგვარად სამართლიანად წარმოაჩინა საბჭოთა ოკუპაციის პერიოდი. აი, ეს არის ”ქართული ოცნება”, რომელიც საქართველოს საბჭოთა ოკუპაციის პერიოდს, შევარდნაძის პერიოდს მიიჩნევს სამართლიანად. როდესაც ხვრეტდნენ ჩვენი ერის საუკეთესო შვილებს, ეს არის თქვენთვის სამართლიანი პერიოდი, როდესაც საქართველოს დამოუკიდებლობის და სახელმწიფოებრიობის იდეა იყო დასჯადი, ეს არის ის პერიოდი, რომელსაც მისტირით.

ამ ყველაფერის სამართალმემკვიდრე უშიშროების სამსახურს როგორ ექნება ნდობა? როგორ ექნება ნდობა იმ უშიშროების სამსახურს, რომელსაც ბიძინა ივანიშვილის დაცვის უფროსი ხელმძღვანელობს და რომელიც კონტრდაზვერვით საქმიანობას ფაქტობრივად არ აწარმოებს? ყოფილმა თავდაცვის მინისტრმა ირაკლი ალასანიამაც საჯაროდ დააფიქსირა, რომ მიცემული აქვს ინსტრუქცია კონტრდაზვერვის სამსახურს, რუსეთის მიმართულებაზე არ იმუშაოს. თუკი რუსეთის აგენტობის და ძირგამომთხრელი საქმიანობის გამოვლენა ხდება ამერიკაში, დიდ ბრიტანეთში, ესტოენთში, ლიტვაში, ლატვიაში, პოლონეთში, გერმანიაში საქართველოში რა, მტრული სახელმწიფოს აგენტები, რომელიც ჩვენი ტერიტორიის 20%-ის ოკუპაციას აგრძელებს, არ არსებობენ? თუ არ არსებობენ რაში ვუხდით ფულს უშიშროების სამსახურს, რომელსაც ეზრდება და ეზრდება დაფინანსება, განსხვავებით ჩვენი ჯარისგან, რომელსაც უმცირდება დაფინანსება”, -განაცხადა კანდელაკმა.

მისივე თქმით, უმრავლესობის წევრმა, სიმონ ნოზაძემ საჯაროდ აღნიშნა, რომ თავს მიიჩნევს საბჭოთა კავშირის საოკუპაციო რეჟიმის სამართალმემკვიდრედ.

”იქნება სინდისი მაინც გეყოთ და 25 თებერვალს, საქართველოს საბჭოთა ოკუპაციის დღეს იუნკერების მემორიალთან მაინც აღარ მიხვედით”, - მიმართა გიორგი კანდელაკმა უმრავლესობას.

უმრავლესობის წევრმა, სიმონ ნოზაძემ დღეს იურიდიული კომიტეტის სხდომაზე მოსმენებთან დაკავშირებით განაცხადა, რომ ინაურის დროს ერთდროულად 25 აბონენტის ჩართვა შეიძლებოდა, შევარდნაძის დროს, 90-იან წლებში რამდენიმე ათეულის.

”ისეთი მასობრივი დარღვევები ადამიანის უფლებებისა, როგორიც 2000-იან წლებში, სააკაშვილის ხელისუფლების დროს იყო, მე არ მინახავს. უსმენდნენ ყველას, უსმენდა ყველა ქვედანაყოფი”, - აღნიშნა სიმონ ნოზაძემ.